今日加拿大政府公佈香港人救生艇新政策，基本上唔理你幾時畢業，只要過嚟做1年嘢或1,560小時，就合資格申請PR（永久居留）。對於本身就行緊Stream B並已經申請左PR嘅人嚟講，呢個政策其實對我完全冇影響。但今朝震撼彈一出，身邊朋友都好大反應。有本身行緊Stream A嘅朋友即刻決定唔讀書，有本身係2016苦主諗住行express entry嘅朋友即刻感動流涕，覺得自己守得雲開見月明，又有香港嘅朋友即刻話要過嚟，問我申請Stream B要交咩文件。
正因為依家香港人移民嘅門欖愈來愈低，離開香港嘅成本愈來愈少，一定會有更多本身就心郁郁想走嘅香港人思考移民嘅可能性。所以我今日寫呢篇文，係出於一個喺溫哥華生活左20個月嘅見習老華僑（lol）嘅身份，分享下喺呢邊生活嘅感受，畀大家思考下，其實你到底岩唔岩過嚟加拿大？？？
1. 生活成本
首先，雖然話自由誠可貴，但現實嚟講，點都首先要講錢。本身係香港我都係搵20K港紙左右，所以嚟到呢邊，雖然都係做啲同最低工資咁上下嘅妹仔工，月薪扣完稅大概2800到3500CAD左右，即係港紙萬六到二萬頭，所以我嘅收入落差不至於話大到令人難以接受。
但如果講生活成本，加拿大係真係貴過香港好多好多。香港地貴在樓價，但如果cheap cheap哋過生活，10蚊一個魚柳包，50蚊一個茶餐，300剪個髮，有時奢華少少400蚊按個摩，對於小資90後嘅朋友嚟講都唔會係難事。但如果想過返差唔多水平嘅生活，喺加拿大你起碼要搵多一倍人工，仲要講緊你愈搵得多扣嘅稅亦愈多。身邊唔少朋友喺到做得返專業人士，一個月搵5000CAD，即3萬港紙，但扣完稅得返可能7成，如果月租用左2000CAD，加埋衣食住行同間唔中同朋友出去carpool玩，可能儲到幾千蚊港紙已經好叻。以我嚟講，嚟到呢邊因為出街食飯太貴，所以養成左takeaway嘅習慣。好似17CAD食一個米線，將個湯底拎走帶返屋企，自己再煮兩餐米線，真係常事（唔好同我講咁樣唔健康😮💨🥹）。為左慳錢，但有時又想食下好西，就只能咁樣慳法先覺得抵返。
所以，如果你係香港地本身搵幾皮一個月，過住幾中產嘅生活嘅朋友，嚟到呢邊仍然好想搵好多錢，幻想可以好似香港大富大貴，真係要諗真啲。你可唔可以接受搵少左錢，降低自己嘅生活品質？（as in衣食住行，唔係自由嘅空氣山脈湖泊呢啲抽象嘢）
2. 治安
香港地雖然近排都變左大刀會，但同北美真係比唔上。溫哥華嚟講，有條國際知名嘅east hasting，以前成街都係住左好多道友同homeless嘅帳篷，最近政府將佢哋趕走，部分又四散到其他地鐵沿線，所以呢邊公然啪針吸毒嘅人真係通街都係。最近去完多倫多，同大部分北美城市一樣，都有槍擊同stabbing，雖然應該冇美國咁癲，但都可以話係幾日一小單，當地人都習以為常。所以如果你好想好自由咁天黑後周圍走，除非你有車，否則我都唔敢。
3. 悶
加拿大悶唔悶呢樣嘢真係好因人而異。以前我住喺香港時都覺得香港好悶，但嚟到溫哥華後，真係覺得自己係太take hk for granted。好多嘢都係冇左先知要珍惜。好似，夜晚有得落街吉魚蛋，要城市生活有城市生活，要大自然有大自然。好多人揀溫哥華就因為有nature，但首先係你要有車，另外如果你中意陽光與海灘就一定唔使諗，因為海灘啲水幾熱都是凍的仲要污糟😊 多倫多就同香港個感覺差唔多，大城市多娛樂，但就冇nature，想搵個山望下都難。但呢樣嘢真係好個人，因為我都識有朋友本身係香港就係嚮往啲比較靜態嘅生活，嚟到呢邊就好享受。
4. 發展前景
雖然排到第四，但我覺得呢樣嘢算係最困擾我。好多朋友本身係香港做專業人士嘅，如工程，會計，老師，律師，醫護等，可能嚟到考完個牌大家有幸可以繼續喺到執業。但如果對於一啲做唔返本行如我嘅朋友嚟講，喺到嘅出路我覺得真係少之又少。以溫哥華嚟講，呢到比較多service sector ，好多local都打幾份工做server 賺tips，唔係話生活唔到，但你想唔想過呢啲生活？多倫多聽落發展機會多好多，但都有好多it同金融界朋友做唔返本行，send左幾個月cv都冇回音，焗住要做啲labour work 或低學歷工種維住生先。
如果你係想創一返大事業，只能話香港地真係遍地黃金。我以前都唔明，但離開左終於明。要有發展，前提首先個地方要有夠多人，夠多錢，夠多開創新思維，夠多機會。唔係講咩都假。
5.總結
呢四個point係我覺得移民加拿大前最要畀大家認知嘅真相。因為有太多朋友滿心歡喜諗住走難或順便拎個加籍，但如果心態唔ready，咁只係由一個所謂地獄跳左去另一個地獄，咁去到邊其實都唔會順心。
所以我覺得最重要係，你問自己，你係咪真係咁想走？係咪非走不可？點解咁想走？如果你問完自己n次都係yes，咁你就可以思考下去邊個地方，同點部署自己嘅移民計劃，咁就唔會嚟到呢邊因為種種落差而覺得期望落空。
最後利申，我都係好中意香港，但過嚟真係只係為左自由兩個字。食得咸魚抵得渴，路一定係難行，一定架啦！但嚟左就頂硬上，係咁！
圖為多倫多China town嘅許留山
（本網歡迎各界投稿，文章內容為作者個人意見，並不代表本網立場。）