讀過譚劍大哥依遍大環境一代不如一代真係覺得拍案叫絕，佢講中我好多心聲，其中幾段真係令我感慨良多「在八九六四期間乘上一輩人移民走佬而水鬼升城隍，那幾年撞到 Managers 好多無料到不得了……」，俾D癈人踩住大家都應該覺得條氣好唔順，其實上一輩人走短線「一手打造」出來依家個香港嘅老屎忽自己食飽了賺盡了，就叫下一代找數，"很多八十後小朋友都很有理想，很勤力，但無法上位"仲要俾班賊喊捉賊嘅人話下一代不如佢地，聽到真係唔嬲就假。
以前香港嘅環境就係有「希望」依樣野，人工每年最少有雙位數增長，就算推架車賣魚蛋都可以衣食冇憂，依家加你5%人工已經皇恩浩蕩，推車賣魚蛋就拉你9鍋，成個環境的確令人好有希望。
依家環境的確唔同晒，上流機會係少左好多，至於「香港已經玩完」依句……我本人絕對唔願意見到，不過無論香港變成點都好，怨天尤人都唔係辦法，唔努力準備自己俾個機會你都係嘥料。一個人如果心入面把火無熄，做事用心，佢成功嘅機會一定比自怨自矣hea住做嘅大。
我記得以前有個電影人佢做過著名導演張徹嘅副導演並且得到器重，後來又係嘉禾公司擔任導演，執導過多部喜劇與功夫片，亦替許冠文拍過幾部賣座喜劇，但以自己名義執導嘅電影就差強人意，仲俾人放逐台灣，後來佢香港有個朋友再搵佢拍戲。幸好依位導演没有因為失意而得過且過，相反佢好用心咁拍依部戲，亦都揾左另外一位好有心嘅演員做……配角，當時依位演員當時叫做票房毒藥，佢本來只係得幾日戲，不過佢覺得套戲正，之後唔收錢任拍，依兩個人冇因為低潮而喪失鬥志，仲張佢地嘅心聲寫成電影對白，票房毒藥有一句對白我好深印象「我衰咗三年，我等緊個機會，爭番口氣。唔係要證明話畀人聽我威，只係想話畀人聽，我唔見咗嘅嘢我想自己攞番！」。票房毒藥就係周潤發, 失意導演就係吳宇森。
英雄本色依套經典就係咁拍出黎， 的確唔怕蝕底，肯搏肯做依句野好老土，不過我始終相信我要得到一樣野之前就先要付出，我心底裡面真係好希望香港人有日可以攞番唔見咗嘅嘢。