文：劉定堅
TVB從前一直領導全球華人電視劇產業鏈，王維基企圖建立精英創制團隊打破壟斷，他以大約一倍人工挖走大批導演、編劇、演員、攝影師等等，又請來電影界的燈光師，再購入八部德國專業Alexa攝影機作拍劇用，以此陣容有可能威脅TVB嗎？我直接的對王老闆的眾高層說，越早開台，你們死得越快！
王維基搞電視似去黃金砌機，Ram改用DDR3、升級用Blue Ray Rambo再加10點觸控屏幕，嘩！仲唔勁到爆燈？偏偏咁搞法必死無疑，因為你塊底板根本support唔到，補品加得越多越行唔郁，連畫面都無，死未！首先編、導、演全來自TVB，關鍵是沒有一個監製過檔，這是大家忽略的重要關鍵，TVB開劇從不關係導演和編審，由呢班人主導開劇，我想問佢地有乜符fit？佢地唔係TVB高層，無多年來向收視統計公司另行購買的專業收視分析報告，唔明白黃金時段邊類劇會收視爆升，邊個年齡層的觀眾特別支持，又唔知邊類藝人演邊D角色觀眾會特別受落，數十年詳細數據是TVB高層開劇的憑據，王維基班底盲摸摸，憑個人喜好開劇，唔撞板搵鬼信！偏偏班編劇、導演幼稚得很，以為有心做好就得，吹漲！
製作方面，TVB用開Sony900的導演和攝影師根本不懂得用Arri Alexa攝影機，舉個例，我知王老闆的革命軍拍劇，下下用成車燈，打燈打到暈，我肯定佢地無人知道部Alexa之咁勁，德國佬盡全力砌美國佬部Red，其中一個勁招係Alexa感光能力極強，打燈可以減少三份二，請問打咁多燈搞乜？咪因為無專業知識囉！唉！改用Alexa機喎，即係要有跟機focus assistant啦，八部機要10個人，單係呢瓣已玩死，請問點樣可以突然搵這種人才？此外，佢地宣傳用5日半拍一集，對比TVB的3日半，顯示自己投入更多，但無講每日以9小時計，即約50小時拍一集，TVB嘛，12小時計一日，拍一集即42小時，根本相差無幾；但用數碼機拍攝複雜得多，結果日日over，每日拍足15、16小時，補水補到叫救命！
製作千蒼百孔，但我認為創作劇本更大鑊，單機拍攝是電影模式，TVB的一大堆對白劇本根本不適用，揸住個口水接口水的劇本，導演點可能編鏡頭？TVB的編劇無鏡頭運動及構圖訓練，萬多字絕大多數是對白，沒有場面設計、不懂得運用場景及道具，沒有為鏡頭運動預留適當空間。好了，我不再說有關編劇及導演們對電腦動畫的無知，對後期數碼製作的蒼白…！還有搵景、走景、減少疏、化、服工作人員的大小問題，所以我好肯定，呢批雜牌軍一上戰場肯定全軍覆沒，死硬！
TVB根本非常低能，但他是巨大的低能怪物，要推倒他，首先要有智慧，其次要有力量，一部砵唔起嘅貴價電腦行都行唔郁，打乜鬼仗吖！放心，開台好快便會徹底崩潰，死唔去就有機會痛改前非，留5億左右夠重組再戰，但全公司究竟有幾多人捱得過失敗的挫折，心理質素頂得住嗎？王老闆又能否找來高手坐陣？佢又是否肯放下身段，虛心坐在一旁多聽少說話，多學習不作主，把話事權交出來，大家看不到這劇變，我贊成你多買TVB股票！
附注：作者劉定堅三十年前創作《蝦仔爹哋》，開創盧海鵬無釐頭金句，創下處境喜劇神話記錄的劉定堅，八十年代轉戰烽火連天的港漫市場，創作了最輝煌年代的《中華英雄》，並成為極少數的代表，只憑藉創作人身份，建立個人出版企業《自由人出版集團》，創作並出版了包括《刀劍笑》、《超神Z》、《狄克戀曲》、《賭聖》等等大批經典漫畫作品；及後進軍小說市場，《刀劍笑新傳》開創了周刋武俠小說神話，憑逾百部作品打開了中、港、台三地市場，經過長時間投入電影及動畫創作及製作，年多前開始進軍國內影視市場，身兼編劇、導演、製作人及投資者四合一身份，繼續挑戰更複雜的龐大市場，延展創作生命。