立即捐款

政經

蔣麗芸為「發癲」言論解畫

廣告

廣告

原圖rthk

昨日立法會最後一場新界東北發展計劃公聽會上,最後由議員蔣麗芸「發癲」一詞引起其他議員不滿。她批評「那些要求陳茂波下台的人是發癲」,又叫「陳茂波看開一點」,又說作為議員都感到很辛苦。新民主同盟范國威指自己也要求陳茂波下台,要求主席謝偉銓裁決蔣麗芸收回冒犯言論,謝偉銓指他聽不到,沒有跟進。

蔣麗芸今早接受香港電台《千禧年代》主持人葉冠霖的訪問,她仍然不認為自己言論有問題,堅持叫陳茂波下台的議員「係發癲」,反指范國威抗議其言論只是「抽水」。她替陳感到不值,形容過去4場公聽會其實是「公審會」,不停「咁(糟)質」局長」。又認為若議員不能接受這些言論,是他們「EQ(情緒智商)低」,甚至解釋自己的言行只是無奈迎合立法會文化,「入鄉隨俗」。

隨後有不少市民致電節目表達對陳茂波的不信任,也有市民叫蔣麗芸不要做議員。聽眾葉太說:「要理性……你的表現讓我們見到我們揀了一個咩質素的議員做野……提醒蔣麗芸好好珍惜做議員…趁這個假期好好檢討一下過去佢做成點樣….」梁太表示:「蔣麗芸唔應該做議員…....衝口而出,變左失禮自己,失禮民建聯」。

以下乃不經删剪文字紀錄:

主:主持人葉冠霖
蔣:蔣麗芸

主:蔣麗芸來自民建聯既立法會議員,噚日你既講法話要求陳茂波下台既人發癲!話叫陳茂波睇開d。呢句說話,你依家睇番覺得點呢?

蔣:唉。琴日,范國威係最尾,個會都要散喇,佢突然間衝入黎,就講呢句話,咁佢都係到抽水,反正佢係立法會都係抽水王,大家公認嫁。

主:講番你自己呢句說話。大家睇番轉頭話要求陳茂波下台的人發癲!話叫陳茂波睇開d!的確有唔少人嗌過陳茂波下台嫁喎,係咪真係話嗌哂d人都發癲呢?

蔣:琴日呢,我成句話係好清楚既,咁你睇番呢,我就會講!全世界反對派既個d人都希望執政個d人執政黨落台嫁啦。我唔理美國,日本呀,任何一個國家都係咁嫁啦。所以我係指緊立法會反對派議員係咁,咁呀,我話d人發癲……其實大家都睇到既,呢幾日d議員又掃抬啦,咁局長係官員休息室休息個時,佢地又拍門啦;拍到癲哂咁。咁你話,係咪發癲呀?係咪?咁我都係有感而發姐。

主:但有d冇掃抬既議員都嗌過陳茂波局長下台?

蔣:咁啊,我琴日都比人鬧我話我發花癲啦。我話佢發癲有咩唔妥呢?佢地呢幾日都輪住係咁質(糟質)局長啦,質都質幾日啦。咁依家我係咁而話佢地一句啦,佢都接受唔到呢d咁既野,咁姐係佢地EQ唔夠姐。

主:姐係你覺得呢個言論冇需要收番啦,致歉啦。你依家都覺得ok啦?

蔣:嘩,咁就要收番致歉啦?咁我諗係立法會入面有好多人既言論要收番嫁啦。
你都記得啦,我早前幾個月都有一次同梁國雄,大家有d辯論個時,都唔開心,咁都鬧啦,梁國雄都有話我,我都有話佢,係咪?咁本來呢個就係現今香港既議會文化,下話?其實我完全無準備咁樣,不過入到立法會發覺d人都係咁嫁?姐係,唉,我都唔知,咁唔緊要啦,我就入鄉隨俗啦唯有。

主:咁唔係幾好。你既然覺得人地做呢樣野,唔岩既時候,就應該指出人地唔岩,但無理由自己又踩埋落去嫁。

蔣:喂,葉冠霖你就唔係現場啦,你知唔知過去呢四日啦,有d日子仲係全日嫁。由朝早9點到下午4點。

主:係。公聽會?

蔣:公審會啊。唔係公聽會呀,姐係個議員呢,真係!真係指住陳茂波,落盡其侮辱。唉,真係呢!所有最核突既字眼搬哂出黎都係咁鬧人地。咁我覺得好過分啦,好過分啦。咁我琴日都只係話左佢地一句呢排反對派既人發癲既姐。咁我有咩錯囉,請問?

《千禧年代》訪問錄音(1.8.2013)

廣告