點解政府機構經常都會提出一些明知會被人鬧的議案出來？其實係唔係一種計謀，讓市民製造聲音反對，令大家更關注社會問題？最近，房署就提出研究向擁有大專或以上學歷的公屋申請人士實施扣分制。聲音，當然是恥笑式的一面倒。
劈頭的論點就是：「高學歷不等於高收入」，這個論點咁Obvious，不需多提。但我還想指出，其實「大專也不等於高學歷」。由董建華開始，政府推廣副學士等專上教育，理論上就是提高社會的教育水平。但事實只是造就大量有錢就可以讀的專上課程。漸漸，出現「學歷通脹」的情況。學歷已經不能代表甚麼，早前甚至有報導指副學士就業比初中生還差，職場上已被扣分，申請公屋都要扣分？
如果真係要扣分，那應該以程度來扣，例如副學位扣一分，學位扣兩分，碩士扣三分。那還要按學科扣分，法律、MBA、醫科呢啲搵錢科目就扣多啲。而耶魯大學有研究指樣貌標緻的人有較多薪酬，咁不如按埋樣貌扣分。仲有高度、IQ、體重、性格等。
如果要實施扣分制，就一定要公平衝量每個人對公屋的需求。之但係諗諗下，呢個社會本來就係唔公平㗎啦。而我哋唔係需要「公平」，只係需要「樓平」咋。
轉載自新報