採訪：哈羅特、周回、我思故我在
文：哈羅特
近日〈澳牛的黃昏〉一文熱爆網絡，連主流傳媒上都可見其影響力，紛紛爭論到底澳牛伙計的態度有沒有改善。〈澳〉文的作者史兄就是有這種魅力，透過筆下文章製造社會話題；然而說到他最為人熟悉的作品，相信非他在去年年底出版的《婚姻這種邪教》莫屬。《婚》出版後深受歡迎，初版迅速斷市，記者身邊有不少平時較少留意網絡消息的朋友都是他的捧場客。史兄在書中以抵死啜核的筆觸，探討一道嚴肅的問題：婚姻到底是否一個邪教？
刺青三位記者都是史兄的書迷，今期與這位人氣網絡作家談情說愛，請他向讀者分享心目中婚姻的本質。
《婚姻這種邪教》背景補充
《婚姻這種邪教》一書由上半部的同名小說，以及下半部的散文集組成。作為全書重心的小說以第一人稱敘述，講述主角的好友森哥在結婚前「臨陣易帥」，與未婚妻Joyce分手，再跟另一個女人在原定日子結婚的故事。史兄告訴記者，小說情節大部份都屬真人真事，並且曾經在他身上發生：「我真係幫個朋友做兄弟，佢結婚前真係換咗個老婆，用番同樣既計劃，同一個新既女人結婚。」而事後他也像小說的「我」般，跟那位朋友絕交。。
他強調，故事的主要脈絡和結局都是真事，而他刻意把小說角色的身分改寫，目的是避免他朋友的那位前度發現。「我唔係好驚個男仔朋友知，我係驚佢以前個女朋友，即係阿Joyce知，因為佢唔係知道森哥咁樣做，攞佢安排既野同另一個女人結婚。」令他比較放心的是，他從前覺得匪夷所思的事，原來相當常見。「出咗呢本書之後，有幾個人同我講，他們身邊都發生過差唔多既故事。」荒謬的故事情節竟與現實如此吻合，也許進一步引證史兄接下來分享的婚姻觀。
史兄的愛情觀
從《婚》的文章可見，史兄在愛情上沒有甚麼道德枷鎖。不諱言自己是個「仆街」：「除左雜交、同性戀之外，所有男同女之間既關係我都試過。」由中學開始，他曾經拍過八場有性有愛的拖，曾經一本正經地拍拖，曾主動地追求有男朋友的女生，也曾被動地接受有男朋友的女生。有朋友問他，如果他的女朋友愛上了另一個男子，但又不想跟你分手，你會怎辦？當時他的女朋友也在場，他如此回應：「咁咪一齊囉，冇所謂。」為何會接受愛情中有第三者？「你同一個異性或同性有戀愛關係，都係想舒服姐，如果佢開心既，咪俾佢去做囉。As long as果段關係令你舒服既，咁我覺得個形式唔重要。」他相信，如果愛一個人是想他開心，就不應該在意對方是否在自己身邊。
既然沒有道德枷鎖，史兄又為何與婚前臨陣易帥的友人憤而絕交？原來教史兄最憤怒的，不是那位朋友劈腿，也不是他臨結婚前找另一個女人。「我最憤怒既係，佢攞咗佢前度幫佢安排既野同另一個女人結婚，其實佢太唔尊重同前度既果一段感情，太唔尊重前度為佢付出既野。咁完全超越咗我既底線。」他因為答應了擔任婚禮的兄弟而無法抽身，被迫在近距離觀看著整件事發展，但卻沒辦法去改變什麼。「佢同我講話婚宴場地係轉咗地方，但其實係冇轉過地方，臨婚禮前幾日我先知。」
對婚姻的抗拒
訪問過程中，史兄一再強調自己不會結婚。對他來說，兩個人在一起的條件是雙方彼此間能夠溝通，能夠「connected」；但他見過太多例子，結婚的兩人根本不能connect，彼此沒交流、沒溝通，婚姻流於形式化。「如果我同果個人connect到，咁結唔結婚只係個好外在既問題。」記者指出很多女孩子把婚姻視為拍拖的最終目標，又算不算婚姻邪教的信眾？他這樣回應：「如果你係追求一種物質生活，而結婚俾到你呢種物質生活，冇問題既。咁結婚其實同返工係冇分別。但我始終覺得結婚唔係咁樣既事。」他認為很多人會把結婚變成形式主義的事情，而沒想清楚結婚的本質，是承諾與對方共渡餘生。「好多人冇諗過對方或自己有冇能力去履行呢樣野，就去諗其他結婚衍生出黎既議題。」
童話故事中，王子和公主結婚後都會永遠過著幸福快樂的生活。「呢樣唔係真既。好多人冇諗清楚婚後有咩問題就結左婚，之後就stuck左係段婚姻入面，走唔到。如果有埋小朋友就更難。」
史兄從小已對婚姻很抗拒。他年紀尚小時，已經知道父母是一對名存實亡的夫婦，儘管他們待他十三、四歲時才正式離婚。無獨有偶，史兄的阿姨及婆婆都已經離婚；他中學時期的兩個女朋友，其中一人的父親在東南亞工作，一年只能回港一、兩次；另一人的父親則是貨櫃車司機，「包二奶」後一去不返。「係我成長既階段，身邊係冇一個完整既家庭。」漸漸地，他覺得婚姻很多餘：「呢樣野suppose係long-lasting，但原來又打得爛。」人大了，他看著身邊的朋友結婚離婚，又眼見朋友因為結婚的事談不合攏而分手，加上《婚》的故事，都不斷地強化他對結婚的看法。
如果有一天，史兄愛上一個女人，而她的婚姻觀跟他有衝突，他會如何處理？在這個情況，他寧願選擇去愛其他人。「我唔會覺得有一個人，我會鍾意到要用結婚綁住佢……我唔覺得呢個trade-off應該存在。點解我一定要攞結婚呢樣野，先可以擁有呢個人？我覺得呢個係好荒謬既交易。」
婚姻如何變質？
雖然對婚姻的抗拒早已形成，但港人對結婚的看法開始變質，史兄則認為是近年的趨勢。他今年33歲，由28歲開始，每一年的年底，幾乎每星期都要出席婚宴，做兄弟也做了十多二十次，近距離觀察使他有所感觸：「啲人似做show多過似結婚，表現出黎既唔係我地好愛對方，所以大家就做儀式，以後會攜手到老；而係做場show，我要講野，要有個地方俾大家gathering。究竟你係真係好想同果個人結婚，還是你係純粹想fulfill某啲人對你既期望？」客觀而言，他認為香港人愈來愈有錢，婚禮引伸出來的產業愈趨強大，婚姻也就變成很商業的行為，很多事情變成用錢解決。「以前搞一場盛大既婚禮係代表你好愛對方，而家係代表你好有錢。」
史兄絕少在婚宴中感覺到那對新人真的是很愛對方，唯一的例外竟然不是一場正式的婚禮。「有兩個女仔係香港結婚，因為香港冇同性婚姻，所以佢地既婚禮其實係冇法律效力。但係佢地係一個小小既宴會廳，請左一班熟人，搵左個牧師幫佢地見證。係果度，我覺得佢地係真係好想排除萬難，以後都同大家一齊渡過。」
既然婚姻已變質，史兄是否不贊成人們結婚？他重申，寫作《婚》一書不是叫人不要結婚，而是叫大家結婚前想清楚：「冇錯，有好多結婚既人當左呢樣野係邪教，但唔代表每一個結婚既人都當呢樣野係邪教。」他覺得婚姻之所以變成邪教，不在於婚姻的本質，而在於人們如何看待婚姻這回事。那麼，一個怎樣的婚禮，才不算是進入邪教的儀式？「能夠唔肉麻地表現到你對對方既愛，你個婚禮已經好成功。點樣做到呢樣野就因人而異，例如上台講番你同你老公老婆既一段小事，講番你地點樣跨過一啲困難，我覺得已經好夠。」
愛情貴乎坦誠
訪問接近尾聲，記者請史兄向有意結婚的情侶說幾句話，以下便是他的忠告：「諗清楚先啦，搵啲方法去驗證下對方係咪可以同你一齊先。人既原則同性格，重要過外在既attributes；一個成熟既人，會明白每段關係都有give and take。坦誠好重要，唔係代表佢所有野都講哂你聽，而係佢會為你著想，講出自己既感覺。同埋，儲錢先啦。」無論各位讀者是否相信婚姻，有沒有打算結婚，讀畢本文，都值得反思一下戀愛和婚姻的真正意義。