呢事件，其實到被拉果刻，我都唔知原來係咁大件事，很多朋友問我情況如何，咁我就係到輕鬆咁膠嗡一下，講明先，我只是一名淆底獸。
警察清場時，膊頭有花既落order做指揮，而三柴警員負責執行，與其話係警員，不如話係中醫跌打師，拗手按穴位擰頭層出不窮，古人謂「柴米油鹽醬醋茶」，我明白「柴」對中國人係好重要，但可否拎出良知，和平清場。相反包圍我地既責任就交比膊頭無柴既警員，佢地表現比較克制。
當時係我隔離就係一大堆短髮女警列隊準備清走女靜坐者。眼見佢地好似無哩神氣，似係被迫聽order，我只好徐徐放下我一把亮麗鬈曲既秀麗，希望令佢地懷緬未入學堂前的青蔥歲月。
清清下場，我們就同警察聯合匯演十月圍城，入面既人出唔到去，出面既人入唔到黎。就黎到八點時，內外既人一齊倒數，Goal………被捕……時間開始變得漫長。
上車前，要走過一條長長既路，途中我同Hollywood既明星出席金像獎一樣，有人幫我拍片，有人影相，美中不足既係無紅地毯。
上到車，諗起三位女性，一個係同行被捕既友人，一個係答應左佢我會安全返家既Maggie，一個係答應左佢我會返去飲湯既阿媽。就好似當年吳國敬答應左「我說過接你放學」 ，而最終不見人影一樣，我失信了。而我立即用僅餘2%電量既電話回覆朋友，請佢幫我係FB 通知我被捕了，電話隨即收皮。係車上，我地成班男人就好似BB仔，係咁搵奶媽，Yeah我搵到啦，飲左幾啖，即刻同人報平安。而同時，我又稔等陣應該點樣演繹「係律師未到之前，我係唔會講任何野」，情況就好似賭神同侯賽因講「我曬你冷，加埋呢張係三千萬瑞士銀行本票……」一樣咁有霸氣而不失大體。
十二隻恐龍去野餐，齊乘坐旅遊車出發了，一跳就跳到到警校，入到去，比警員認出我係畢比特，佢地拎住文件，問我拎簽名，又問我咩名幾高，企圖核實我就係畢比特，又要求影即影即有。可能因為我地成班都唔係常客，所以佢地都好客氣好輕鬆，又會講下笑，又會話「唉啊，莫講話你地，我地都唔滿意上面既政策，你地唔好暴力就得」，我地回應「嘩，我地好和平架」，講下講下就到食飯，飯盒營養價值好高，有肉有菜有五穀類 - 白汁雜豆火腿絲飯，比豆腐火腩飯更男人，而且好岩我地呢D經常拍戲要保持身型既人。
之後落黎既都係等，最後出一份警告通知，咁我地就一車一車就送出去離開警校。
向當日付出過的每位致敬
抬頭吧，相信愛你便能飛
敢交出，你會創出傳奇
完
後記
好多朋友問我有無事，有無手尾跟。我沈思左一陣 : 應該有，因為可能有Madam睇中左我……
題為編輯所擬