立即捐款

社運

時間就係生命呀老細!——全球化下的散工揾工記

時間就係生命呀老細!——全球化下的散工揾工記
廣告

廣告

草媒編按:有位做散工的基層市民,近日因被人事公司玩了一舖好激氣,寫下過程,好值得大家基層朋友分享!

文:散工偉

話說我近排都係返下一些散工,發生左激氣事,同大家分享一下:

個故事大概就係跨國做生意的公司,點樣用個制度去綁起人,唔當人啲時間係時間。

份工我係點搵呢?

睇到兼職網,話請短期包裝員,然後電話交涉,原來係一間人事顧問公司A。填了張表,隔左一個星期,忽然打電話來話第二日(11月26日)要面試,五點鐘去到青衣地鐵站。去到,人事顧問公司A約了10人,由青衣地鐵站再乘的士去工廠。

去到係一間在青衣新填海區的一間工廠,上到去原來係一間時裝店,NET-A-PORTER,我就未聽過,不過個接待處就好靚囉。
 
我5點半面試,那時有約30個人,4點半那批,也約30人。

作為一個包裝員的面試,是包括筆試和實習試,筆試包括翻譯10個英文字,3條選擇題,同2組配對,還有睇片做包裝。

考英文,全部都係好少見的,及與成衣有關的英文。配對,係一隻高踭鞋同5個英文字,還有一件恤衫的英文字。我心諗,你叫我用中文講出高踭鞋的5個部份,我都有困難,你唔係考埋晒呢啲英文嘛……

面試時總會有人問,返幾點?

職員話:到時就會知。我地公司每年兩次請兼職,今年是12月和1月,夏天還會有一次。另外,仲有3日TRAINING,大家要預12月4、5、6要回來。

過左兩日,個人事公司問我係咪12月同1月整整兩個月都可番工,我話得。唉,點知咁就俾人老點左啦!

佢話,12月1日,我地要去人事顧問公司B會負責同我地做CRIMINAL CHECK(犯罪紀錄),又有去另一間人事顧問公司C,話佢會負責同我簽約。

最後同呢間人事顧問公司C交涉時,我都興興地,我問幾時有工返佢地就硬係話唔知、遲啲講,但就係咁問我個人資料。

算啦。我12月3日一口氣就走去灣仔做左CRIMINAL CHECK同去左中環簽約。簽約時,我再三問:即係幾時要返工?

佢同我講,話返A公司叫我返的時間,而簽約內容是12-1月。張約都係賤賤的,因為講明係人事公司請我而非工廠,咁即係若果我做做下野工傷的話邊個會負責呢?仲有,張約只係寫12月至1月返工,時薪五十元,除此之外無咩特別,想不到,原來是內有古惑!

正式開工 等於無業十日

好喇﹗上TRAINING啦,原來只是得一日而唔係之前講的三日,不過好在係有糧出的。

原來,男女仔係分開請,男仔做執貨,女仔做包裝,男仔由細路至伯伯共有8個,個倉好似一間好大好整齊的玩具反X城咁,全球喜歡訂呢隻牌子代理的其他名牌的人會在網上落訂,訂單來自世界各地的人,

至少有中國美國,因為啲貨要報關,就要另外放開。然後,所有野,每日用DHL寄晒出去。

正式返工係12月8日,即是剛剛的星期一,係朝八晚八。除了8個臨時工之外,亦有一些全職員工,大概七至八人。其實做到三四點,已經得閑到要搵其他野做。放工時,個主管講,除了收到通知的人外,其他人18號先至再返工喇﹗

O晒嘴。即係,番左一日工加一日培訓就失業?但呢十日期間,無糧出,又揾唔到第二份可以番十日的工喎。

咁呢八個男士,話晒都一齊TRAINING,就即刻問究竟邊個有得返,原來只得一個!

個個人對眼嗰個失落樣,真係唔可以用墨筆去形容。

放工時大家坐廠車,我同其中兩個有傾計,原來大家係來自三家不同的人事顧問公司(他們來自另兩間人事顧問公司D和人事顧問公司E),張合約會有些不同,但最相同的是,大家都係預左12月同1月有工返有糧出。

一份50小時既工作,預左返兩個月,網上廣告是寫朝九半晚六半,每日九小時,每周做六日,所以,我預算,用了兩天的時間蝕俾佢,去青衣面試, 去灣仔俾人查犯罪紀錄,又要去中環簽約,都算數啦。

依家個情況原來係,返完兩日上工加培訓有薪,然後就十日後先至再有糧出,18號之後,又唔知有冇啦喎!

大佬呀,我地的時間都係時間嚟!之前問定我地係咪整整兩個月都得,原來就綁住你啲時間,等佢隨時自己決定要請你幾多日!我呢啲淨係養自己就話啫,如果要拎錢番屋企果啲,咪俾你玩死?!

真激氣!!!其實過程中,所有人都好NICE,就係個制度玩殘你!

全球化乜春呢?

呢篇文仔,我點都要係個標題之下加個「全球化」呢三個字,你真係只能夠相信,全球化的得益者只係得有錢有權有勢的人。

呢間有能力收集全世界名牌子,和有能力做足宣傳賣貨給喜愛名牌子人類品種的公司,你諗諗,件貨由原材料至製成,由製成運送到人類品種手上,中間要經過幾多工人的血汗和時間,同幾多唔當你地工人既血汗同時間係血汗同時間既情況。

香港喎……國際城市喎,真係唔好以為件衫俾去窮地方度製造,就眼不見為淨?!件貨經一經香港,品質彷彿又安全點,保証又彷彿,出出入入都自由點,公司又賺到錢,人類品種又有名牌子,然後,件衫經過手的每一個工人,都係被搵笨!

我又真係唔信得這一間公司是如此衰格,老友﹗ 遇到如此衰格的情況,至少要講出去!

【草根.行動.媒體】

廣告