文：蔷凡
自從考入食品及營養科學後，三日唔埋兩日就會有人叫我幫佢減肥……
「喂，食咩可以減肚腩?」
「比個餐單黎啦營養師。」
「我大脾好粗，係咪唔好行咁多好D？」
「下！飯唔係好肥既咩，我戒左飯喇。」
每次聽到，我都好想喊，好想嗌；「全部同我收聲！收聲！」但係我無，因為我知道，呢D咁愚蠢既問題之所以會出現，其實錯不在佢地，要怪就怪香港政府。其實我一路都覺得好混亂，政府成日教人「預防勝於治療」，但一路佢都係著重於「治療」，例如企圖無限增加醫生護士人手同起醫院，但有無諗過點解愈黎愈多人病，甚至愈黎愈嚴重? 點解唔預防下? 我真係好唔明。
專業少少講，大約有三分一既癌症係因為飲食問題引致（腸癌最易明啦）；而肥胖亦都被證實會大大增加N樣慢性疾病既風險。即係D人成日講既 you are what you eat 囉。
係香港，營養師除左等如減肥之外，冇人會知係咩黎。其實現時香港得香港大學同中文大學有食品及營養科學學士，而太空總署就有一堆相關既文憑，無論係讀完學士定幾個月既文憑，甚至去圖書館睇過本食譜，都可以話自己係營養師，打開個門口做生意，係唔犯法的。我覺得，真係恐怖過鬼片。 試過係屋企樓下接到張傳單，話食代餐減肥，我一睇，頂，咁食法，唔暈我跟你姓。是咁樣既，個代餐係一杯睇落難食過屎既粉紅色__ __ (奶昔！？)，每杯有二百幾卡，一日三餐（每餐一杯），一星期就可以瘦X磅。其實一個正常女人都要起碼一千卡路里先吊到條命，如果長期食太少，遲早仔都生唔到（因為絕對影響月經，仲有好多好多影響……自己wiki）。
咁咩係註冊營養師? 係香港讀完學士，太空課程，咩都好，都係無牌既（雖然無牌都可以話自己係營養師）。如果想考個牌，入醫院做，就一定要去澳洲讀番兩年，比一大大舊錢，實習完pass埋個試，就叫做註冊營養師，即係話，窮L注定註唔到冊。（其實香港都有得考牌既，不過呃錢既野唔講啦）
如果無牌都可以執業，唔使註冊都得? 就算讀完三年學士，都唔知學左D乜，無實習無臨床經驗連醫院病人都無見過，更加無一個course 係專教你幫人減肥增肥開餐單等等，衰D講句，廢既。 如果有個糖尿病加腎病既人黎話要減肥，除左企係道你眼望我眼講聲HI，我都唔知可以點算。
係營養界別，學士仔同睇過食譜既阿嬸係註冊營養師眼中有著一樣咁低既地位，兩個字—「唔專業」。
講黎講去，都係因為香港政府唔重視營養既重要，如果我死前可以睇到香港都有自己既考牌同註冊制度，保障番一眾有passion既窮L同學士仔，等多D人知道飯其實唔肥，我相信哈姆太郎每日都會咁開心。