每年到左畢業生準備搵工之際就總會有報導話九十後有幾唔挨得，又要高人工又唔肯ＯＴ。對老闆黎講有個人工有咁低得咁低工時有咁長得咁長既員工先係最好，但一個做野做到呆哂既人工作效率又有幾高？員工雖然係收糧幫老闆做野，但員工都係一個人，都有佢自己既生活，員工既一生唔應該只係做野。我唔否認九十後好多人唔識禮貌做野又差，但咁都唔應該將所有九十後定性為任性既一群。唔做奴隸就要比人話，公平咩？
香港消費高，為左養活自己同屋企人好多人都會好著緊自己份工。就算個老闆成日臨收工先比幾份野你話急用幫佢做埋先、就算返到屋企都仲要ＫＥＥＰ住ＣＨＥＣＫ Ｅ－ＭＡＩＬ、就算有幾多唔合理既要求都好，香港人都可以毫無怨言咁做落去。社會鍾意讚依班人肯挨唔怕蝕底，有獅子山精神，其實只係一班商人暗笑緊有一大班廉價勞工可以用。一班上左年紀既五六七十後不論係打工定係老闆都覺得做到隻狗咁係冇問題，因為佢地以前既社會係多勞多得。就算到左而家個社會已經變哂都好，佢地都拎住舊果套黎辦事同埋作為批評「而家啲後生」既準則。其實而家九十後只係要求ＷＯＲＫ ＬＩＦＥ ＢＡＬＡＮＣＥ，工作同時不忙要有自己個人既生活，依點本應係正常不過，畢竟返工唔係真係賣命，點解打工既要同你將生命都燃燒哂係份工身上？
返公時間其實訂左係咁多就咁多，真係有急事耐唔耐幫老闆ＯＴ一陣其實唔係大問題，但而家班ＨＲ同老闆就當左肯ＯＴ係基本野。但我相信係老闆唔係比唔成正比既工作量既情況之下，ＯＴ只係一件無謂既事。一個正常能力既人理應可以係工仍時間內搞掂哂啲工作，如果佢日日都要ＯＴ，我相信佢既工作能力係有問題。如果打工仔要ＯＴ係因為工作需要，例如個客係外國人經常係五六點先會覆你趕住要既野，或者日日都要對住大量既文件根本冇可能準時走，咁好明顯就係老闆既問題。一係你就直接係合約寫明工作需要係放六七點，唔好簽完約先話其實ＯＴ係一件好正常既事，再唔係你就加高個人工。就算你出去食個公仔麵想要加料都要比錢啦係咪？
係香港無能既九十後一定有，但我覺得過份既老野更多。你果套而前既年代可以唔代表而家仲得，後生唔跟你果套做法唔一定係反叛，只係唔同年代既人思考上會有分別。係話九十後出黎做野唔識人情世故之前，班老闆又會唔會意識到時代已經唔同左？點解人地ＧＯＯＧＬＥ個工作環境咁多休閒設施去比員工「偷賴」都好佢地都可以有咁高既工作效率？對於班仲係以為死做爛做就係好既五六七十後黎講，佢地永遠都唔會明白。
一個讚好，是對我的一點支持。
如果想分享給其他朋友的話，請標明出處並附上專頁網址。
https://www.facebook.com/MaoYanDe