最近思緒較亂，依篇文既大綱一直寫左係電話備忘錄，但到今晚先記得起。近期咁多人關注港隊足球，或多或少同中國張臭串海報有關，同時中港咁多年黎既各種矛盾亦都令中港大戰別具意義。有人話體育同政治應該分開，但我就覺得硬係要將體育政治化既係中國。好地地香港隊係要變成中國香港，但我又唔見有中國上海中國天津，當香港人比人迫到咁既地步，反抗都係人之常情。而且中港大戰支持香港係必然既事，所以我唔明點解仲有人會怪香港市民將政治帶到足球。
如果有留意足球既讀者應該都知Catalunya最近正爭取脫離西班牙獨立，而佢地最著名既球隊就係以首都命名既巴塞隆拿。點解碧基最近代表國家隊出賽會比西班牙人鬧？正正係因為佢就係效力巴塞隆拿，而巴塞隆拿亦都係佢既出生地。每當有民族意識或者政治衝突，體育或多或少都會收到波及，特別係足球。因為足球係全世界最受歡迎既運動，而足球員出場就係代表住果個地區或者果個國家。點解我會撐香港隊？因為我係香港人，歸屬感令我支持自己既隊伍。團結同歸屬感係成為球迷不可或缺既條件，如果你強行要用純粹欣賞既角度去睇足球，將民族感啊對香港既感情之類全部暫時放低既話，我好老實咁講，到底仲會有幾多人仲會支持港隊？連結住香港隊同香港人就係「香港」依兩個字度，到底足總明唔明？
有好多野唔係你話想點就點。正如你幾唔想都好，足球都政治永遠都會連上關係。足球為一特別既地方就係無論你係黃絲藍絲警察消防醫生都好，只要你係香港人，只要你對香港有歸屬感，你都會入場支持香港隊。係比賽既九十分鐘，冇人會理你係咩背景，只要你著住件港隊衫、紅色衫、或者只要叫聲香港勁揪，係果一刻你就係自己人。
一個讚好，是對我的一點支持。
如果想分享給其他朋友的話，請標明出處並附上專頁網址。