文、圖：MoKeeKee@聰明選民
7月香港好鬼熱，選舉氣氛更熾熱，「做個聰明選民」各成員正為9月非建制陣營決戰立法會作準備。我地將之前請各市民做的重要議題問卷及重要議題排名問卷的結果整理好，將想問的問題製成「真.民主參選人調查問卷」，交到參選人手上，並已陸續得到他們回覆。
同時，為更了解各非建制陣營參選人的政綱和理念，「做個聰明選民」除了會邀請他們到D100節目接受訪問外，還會在8月分別為全港5個直選選區及超區舉行選民和參選人的對談會。
講真，在香港，這類參選人跟選民互動的對談會都係第一次舉行，「做個聰明選民」眾人都有點戰戰兢兢，生怕準備不足而白白浪費了參選人和選民的時間，於是聰明選民於7月尾安排了3場集思會，邀請到場的選民一起 brainstorm 我們已收到的部分參選人的回應。
好緊張，究竟我地千辛萬苦收集左2千幾名市民意見既問卷，參選人有幾重視呢？他們又答咩野呢？其中一條係問 「你認為立法會議員是否有責任令香港成為公義社會」，參選人A答了很多要點做點做，參選人B答要「自主」。一聽到「自主」兩字，有部分與會者即兩眼發光，但馬上他們就知道自己開心得太早，因為參選人B根本沒說明實質計劃或行動，他所謂的「自主」其實似口號多D囉。
至於參選人A的回應，雖然給人老老土土的感覺，但他卻在另一題指出如何達至民主自決，並且顯示出對弱勢社群及公義的關注，而且從他過往的行動中可以知道他有能力實踐提出的建議，咁睇睇下似乎參選人A正D喎﹗Well，咁又不能太早下結論，其實仲需要要繼續追問參選人A，了解多D。如是者我地將參選人嘅答覆拆解又重組，「重新認識」參選人。做這些「練習」其實都幾好玩，做完之後仲覺得自己醒咗添，知道多咗參選人的自我定位、理念、願景、能力、對政策的熟識程度…，又知道多咗政策嘅嘢，原來政策同法例就係咁一環環建構出各社會現狀。
雖然我地只係BB班，但我都覺得咁樣去仔細拆解社會現狀的工夫好重要。你知啦，早前英國脫歐公投有D人在知道投票結果後才去了解脫歐甚至歐盟是什麼一回事，又有力爭脫歐的政客在投票結果出了後，先至話部分承諾根本不可能實現。嘩! 咁既表現真係令全世界都為之O嘴。為咗唔想失禮人，我寧願宜家知多D學多D，好過投咗票之後才後悔。
聰明選民除了選民有say外，我地都嘗試讓參選人盡情發揮，咁先 fair 嘅 。所以聰明選民係D100「聰明選民反屈機」節目，有個「疑似參選人專訪系列」，讓參選人發表意見。你會發現參選人對同一個政策，例如土地政策會有不同的見解及策略。我係度諗呢D參選人當選後，如果能聯同公民社會共同在議會內外監察政府，咁或者我地可以唔使每隔幾個星期就要去遊行、或者又要趕去煲底撐東撐西。
話說之前被拉倒的俗稱「網絡23條」法例修訂及「醫生註冊（修訂）條例草案」，都係由網民組織及專業團體首先察覺出不妥，在公民社會鬧得熱哄哄，非建制議員們才如夢初醒，在議會內合作抗爭。有些現任議員都坦白承認，他們也許對政府推的某些法例或政策都不太熟悉，政府又鐵板一塊寸步不讓，硬要捆綁式通過，往往到了很後期才有人「吹雞叫救命」，攪到公民社會成日疲於奔命，真係大家都唔想。
這亦令社會上持不同意見的人沒有充分時間溝通，造成進一步撕裂，不斷內耗。如果參選人和公民社會能建立互信，甚至做埋某程度上的分工，例如有人專責留意政府的土地政策；有人推動政府做更完善的扶貧政策；有人監察政府的財政建議……如果有遠見，有能力的參選人能當選，加入立法會各委員會，晨咁早就把公民的聲音帶進議會，讓公民社會主導，咁樣應該可以打破現時的困局。而且透過呢個過程，議員同選民既質素都得以提升。
咁即係話9月立法會選舉，我地不但要盡可能送最多的非建制參選人入議會，仲要揀有能力，能持續推動議會和公民社會溝通的議員入去。喂喂，唔准笑，我知你諗緊乜，你覺得我地白費心機，做乜都冇用，但唔試過唔做過又點知得唔得？咩都唔做就認輸？邊有人咁低B 。
重有，如果你自命不凡，十分認識各參選人，好清楚知道要投給誰，又有好多橋對抗政府的橫蠻無理，咁我唔該你更加要幫幫忙，join us，等社會上個個人都好似你咁叻，因為現在香港已經被人迫到埋暗角。香港人「贏就一齊贏，輸就一齊輸」，除非走佬，否則冇人可以獨善其身。人地Michelle Obama大大聲，好proud咁話俾全美國聽，每一個選舉都系要選有能力開拓孩子們未來的人，嗰一刻佢真係型爆，但其實我地都可以! 只要我地共同努力，推選更多有能力的參選人進入立法會，令香港重回正軌。所以選民要把握這個機會，唔好話我地老土，唔好坐係度等運到。
我地係香港人，係香港既主人，together we make changes happen， 9月決戰立法會！