文：「做個聰明選民」運動
除非你係中共能夠用「掌心雷」同「蛇齋餅糭」配票，正因為民調會有誤差同人人心理不一樣，所有由民間發動嘅「策略性投票」都係極度有機嘅遊戲，而結果更往往難以預料，係無話實得嘅。（有興趣可以睇下呢篇對加拿大上次策略性投票分析嘅文章）
所以你一係認輸乜都唔做、任由議席拱手送俾保皇黨同建制B隊。但如果仲想同極權惡魔鬥，就要有冒險嘅精神、同埋要願意變通。在香港而家咁畸形嘅選舉制度同條例下，選民收窄名單只有兩個實際工具：「質素」同「勝算」。善用呢兩個工具，非建制選民就有機會殺出一條生路！
「做個聰明選民」網站製作咗一個「聰明選民工具箱」，收集咗最有用嘅材料，等大家可以好方便咁運用「質素」同「勝算」呢兩個工具嚟收窄名單、集中票源，係九月四日重奪議會話語權。
「聰明選民工具箱」裏面有好精采嘅嘢等緊大家攞嚟用：
參選人勝算走勢
港大民調有誤差？千祈唔好用？對家用「掌心雷牌」GPS，唔通我哋連唯一嘅指南針都掉埋？盲頭烏蠅亂咁飛，唔撞埋高牆先至出奇，開心死佢哋！
估量參選人勝算除咗睇民調排名位置外，重要睇埋参選人嘅「被支持度走勢」，再睇埋游離票嘅影響，加加埋埋就可以增加對「勝算」估計嘅準確度（係增加、唔係肯定）。
唔駛驚！已經有專業人士同我哋做咗工夫：「前線科技人員」根據港大滾動民調嘅原始數據製作咗一個非常清楚好用嘅互動圖，只要你去嗰個專頁，揀你個選區，再揀個參選人嘅名，佢條「支持度走勢線」就會出現，你再揀多幾個人名，就可以作出比較；「前線科技人員」好周到，又喺走勢圖嘅旁邊出一個當區所有參選人嘅「民調排名」表俾你參考。
更精采嘅喺無論係走勢圖或係民調排名表，你都可以揀包唔包括「游離票」（即喺未决定嘅票），包括「游離票」又可以準確一D囉。
依個專頁會不斷更新嘅。
好嘞，睇埋走勢同民調排名，加上民調誤差度估計之後，如果發覺有幾個人勝算差唔多，咁又有咩橋呢？咁就要用番「質素」呢個工具。
好使好用嘅「質素」
「質素」喺自己個人嘅主觀要求，「勝算」喺客觀嘅大環境數據，我哋先用「質素」做第一輪嘅收窄名單，揀自己喜歡或可以接受嘅參選人，然後再用「勝算」做第二輪嘅收窄名單，但當「勝算」相若時，呢個客觀嘅指標就會失效，咁我哋就要用番「質素」呢個主觀指標嚟導航，係「勝算」相若嗰幾個參選人裏面揀自己最可以接受嘅一個，咁樣，都唔係好複雜啫。
「聰明選民工具箱」裏面等你比較質素嘅材料有：
1. 各區參選人議題問卷答案並列表
2. 五區及超區「聰明選民與參選人對談會」
3. 主要選舉論壇
4. D100參選人專訪
龍蛇混雜，名單多如天上星，千祈唔好益咗保皇黨同建制B隊。如果你仲未決定投俾邊個，快D嚟「聰明選民工具箱」（www.smartvoterhk.org）攞D工具嚟收窄名單啦！
呀，差D漏咗個口訣添：
無質素者唔駛諗
無勝算者唔考慮
睇完質素睇勝算
如果勝算差唔多
再用質素做决定