今次立法會議事規則的修改，魔鬼在細節，魔鬼最中意人懵懵下。
婆婆懵懵下嘅，你可以同佢講：婆婆，宜家立法會改議事規則大鑊呀，想像下廖嬸佢襯你打麻雀小相公改麻雀規則，話以後叫糊要梁師奶先批準喎，仲有去廁所的話一缺三先點人數，就咪就牌照打，會照開，糊照食。
婆婆：梁師奶同廖嬸真係離譜，等我話比其他雀友知先。
阿媽懵懵下嘅，同佢講：阿媽，宜家立法會改議事規則大鑊呀，即係好似樓下街市想趕走豬肉佬咁，嫌佢地拉布拉多-多口水喎！
阿媽：下，有無搞錯呀，你老豆食豆腐火腩煲慣咗食豬肉陳啲新鮮五花腩嫁！等我落去同豬肉陳吹下水聲援先。
二叔公懵懵下嘅，就同佢講：阿叔，宜家立法會改議事規則大鑊呀，陸合彩電腦票$20改$35！
二叔公：Hang! 我得番廿幾蚊咋！我要去陸合彩門口瞓街抗議！
二叔公個仔勤仔：嘥氣啦！瞓街無用嫁，叫口號無很多用嫁！陸合彩廢嫁！勤仔其實係醒目仔，絕對唔係懵懵下，但佢選擇乜都唔做。若果到時佢老豆真係再買唔起陸合彩電腦票，勤仔應該會話：都話陸合彩廢嫁啦！
若果我係勤仔，我會覺得愧疚，因為我不但咩都無做，仲長他人志氣，滅自己威風。若果我係勤仔，幾無力都好，都唔應該只係放灰，那怕只係同老豆講一聲加油都好。
芸嫂批評瞓街即係做SHOW，但瞓街背後嘅目的唔可以懵懵下唔知。一切都係為咗醞釀輿輪，壯大民意。唔中意瞓街，可以諗吓做啲咩可以達到同樣目的。或者除咗凝聚民心，你仲認為可以做啲咩呢？今時今日，立法會係廢廢地，但唔想佢更廢嘅話，希望沉默的大眾唔好再扮懵，可以幫手喚醒真係懵懵下的大眾，話比佢哋知發生緊咩事，修改議事規則會有咩後果。咁下次佢地收到電話民意調查嘅時候，起碼唔會盲目批評拉布，唔會懵懵下支持修改議事規則，自廢武功。
做人只求問心無愧，知嘅唔好扮唔知，唔明嘅唔好扮明，明嘅知嘅就知其不可為而為之，而真係唔知唔明嘅唔緊要，去求知就得啦。