話說政府撤回復職權修訂草案，聲稱係因為張超雄提出嘅修訂內容「偏離」勞工顧問委員會早前達成的共識，要再諮詢勞顧會；勞福局局長羅致光更加講到勞顧會嘅共識係好難能可貴，唔希望純粹透過立法會投票處理重要嘅勞資關係。
咁，勞顧會究竟係乜東東？
勞工處網站就咁寫︰
「勞工顧問委員會（勞顧會）是一個非法定組織，就一般勞工事務，向勞工處處長提供意見。」
提供意見咋喎，乜原來咁就可以凌駕立法會？
好啦，咁睇吓勞顧會有咩人啦。
6個僱主代表，其中5人由僱主商會提名，另1人張成雄係「個人身份獲委任」。僱主代表就梗係企僱主嗰邊架啦，咁張成雄係乜水？哦，原來係中華總商會永遠榮譽會長、潮州商會前會長，佢個仔張俊勇係經民聯執委，舊年年尾報咗名參選港區全國人大代表。
再睇埋「代表僱員」嘅「僱員代表」係乜水。
同樣係有6個代表，其中5人係「選舉」產生，由工會選出。不過，勞顧會喺2017年換屆，當時有416間已登記嘅工會有投票權，當中逾一半係工聯會屬會，要操控選舉話咁易。
呢次選舉呢，就有388間工會投票，係用全票制，即一個工會可以投5票。票數方面，接替工聯會吳秋北嘅鄧家彪有344票，票王嚟架。另外，陳耀光300票，周小松294票，王少嫺265票，劉玉輝241票。
喂，咁其實係咪職工盟唔夠人哋揪咋？咁就要睇埋選舉方式喇。其實職工盟總幹事蒙兆達Mung Siu Tat一早就寫過文，講過勞顧會嘅選舉方式有咩問題︰
現行勞顧會的選舉方式，其實已註定不能產生具獨立意志的勞方代表。現行6個勞方代表，其中1個是政府委任，另5個是由「一會一票」選舉產生。所謂一會一票，並非每票選一名代表，而是可盡選5名代表，即所謂「全票制」。以工會數目而言，親建制的工聯會手握逾250票，作為全港最大工會集團，已可包攬所有勞方代表席位。現實上，工聯會雖並未全取所有席位，卻以配票方式操縱選舉結果，「順我者昌、逆我者亡」。
表面看來，「一工會一票」是無差別對待，但這樣的「公平」只是徒具形式，實質荒謬絕倫。大家試想想，一個只有7人的工會享有一票，代表9萬會員的香港教育專業人員協會也只享有一票，形成極嚴重的「同票不同值」。再者，有些工會集團為了囊括所有席位或操縱選舉，便會不惜不斷催生小型工會以達到種票效果。
咦，咁淨返嗰位個人身份獲委任嘅僱員代表係乜水？嗯，佢係香港大東電報局職員會秘書嚟嘅。
其實，勞工議題又點會同政治割裂得到？所有關係、利益、瓜葛，都係一環扣一環。如果我哋唔努力為勞工議題發聲，試問「幾時都係企喺打工仔對面」嘅工聯會，又點會為你爭取權益？
復職令修訂草案，政府諮詢嘅就係呢班人喇。
*********************************
延伸閱讀︰
有關政府徹回復職令修訂草案
蒙兆達︰勞顧會選舉被操縱 工人代表不代表工人？
勞顧會僱員代表選舉的前世今生
職工盟提出改革勞顧會
勞顧會委員之一、工聯會鄧家彪，加入民建聯並參選立會新東補選，選舉近了所以政府要kill bill