哭完票喪，講正經事。
姚松炎輸咗，佢承認責任，我欣賞佢呢種態度。既然輸咗，就一定要問點解，先可以避免做阿寶。
首先，初選搞到返唔到轉頭。其實好多人都唔鍾意馮檢基做政壇李克勤死唔斷氣阻住黨內後進接手，所以嘲笑馮檢基係網民習慣。不過，攻擊馮檢基呢樣嘢唔應該姚松炎嘅盟友朱凱迪做架，尤其是初選完之後，大家突然好似醒覺初選有替補機制，咁然後就有人俾壓力要馮檢基退出。泛民唔係流架，俾壓力李克勤個人係邊個，好快又全世界都知。咁呢個人係姚松炎盟友，結果都係令姚松炎形象唔好。
初選搞到咁大仇口，民協都繼續有幫你宣傳擺街站，算係咁啦，而姚松炎都話民協有落力幫佢助選。但係咁喎，民協幫你，唔代表同情民協或者馮檢基嘅選民條氣順喎。我呢度講同情唔一定係民協個區嘅選民。
姚松炎本來係功能界別，而家空降九西，九西選民呢度唔係個個識你，佢本身已經欠缺地膽、地區工作、樁腳，你要起朵，只能加倍落力。佢本身冇政黨組織背景，人丁單薄，好多時真係要靠泛民聯軍幫手，聯軍嘅嘢，係幫你擺街站派傳單，頂多搵啲大哥大姐出馬幫你站台，其他細緻嘅入屋工作真係靠你本身個團隊。頭先都講，姚松炎本身冇組織背景、冇地區人脈，真係難搞。選舉團隊嘅鄭司律選後都公開致歉，佢地人手有限。
姚團隊一直被指文宣同落區做得唔夠多，冇組織、唔夠人可以解釋到。但佢地亦都被批評唔夠著重落地工作，咁呢個唔夠資源定真係唔夠重視落地工作，有待更多有份參與嘅人講，我作為一個觀察者真係唔敢武斷。
姚松炎團隊呢次選戰，有一樣嘢真係出咗名，就係手作BANNER。啲手作BANNER一睇就知係朱凱迪啲FRIEND。有朋友笑道，人手寫大字，再貼個姚松炎上去，好似山口組尋仇咁。我睇就覺得似《食神》火雞姐剪貼食神啲相咁。我知，朱凱迪都係咁宣傳，人地比例代表制都有八萬幾票。但係朱凱迪係菜園村深耕咗好多年喇，仲要挺身對抗橫洲土豪劣紳，佢咁樣人手寫BANNER加踩單車先符合土地正義嘅形象，況且人地係選比例代表制，你只要吸引到10%至20%文青同進步選民就得。
但係而家姚松炎選單議席單票制，全世界選單議席嘅時候其實都要盡量吸引最多選民（所以通常單議席選舉嘅國家都會演變成兩黨壟斷，因為小眾口味政黨冇運行）。朱凱迪風格嘅BANNER，你去新西吸引進步選民仲可以，但一去到九西，呢度冇人識你，你啲手寫BANNER好易俾一般選民覺得你唔夠認真，咁就出事。
當然，BANNER未必係致命。其實姚教授只係輸二千幾飛，每度跌少少票，就二千票了。
咁有人會問，本土票呢？其實如果大家唔係金魚記憶的話，會記得呢個位本來係游蕙禎架。本土派支持者唔係泛民基本盤，佢地唔係奉旨出嚟投票，你只能夠當係跌咗，呢個都唔係焦唔焦土嘅問題。不過，雖然游蕙禎一早講咗唔表態唔想變死亡之吻，但係其實同游蕙禎FRIEND底嘅區議員鄺葆賢同佢啲友好都有落力幫手拉票，算係咁喇。
講咗咁多，我其實未講到最重要一點。呢次姚松炎嘅對手鄭泳舜，你有冇印象聽過佢講嘢？有冇印象佢有咩政積？冇唔緊要，好多人記得謝霆鋒同佢拍片，仲有佢同派飯嘅明哥拍片，仲有佢同民望最高嘅前局長高永文拍片。佢成個CAMPAIGN就係不斷淡化政治問題，少講少錯，玩名人效應。加埋媒體全力催谷（你知道嗎？香港01選前同佢做咗四次專訪，咁嘅優待其他候選人冇架）、已經成熟嘅土共數票系統，就險勝你二千票。
見到姚松炎落選，我都好失望，但更擔心係親共派愈來愈識選舉，文宣到數票到接送都愈來愈熟練。陳家珮英文爛仲要搵臭名遠播嘅周融幫佢做專訪講英文（仲要講得唔好，真係SOSAD），鄧家彪竟然搵基督教界過街老鼠梁燕城拍片，選舉當日仲要有知名藍絲去圍住港島區嘅區諾軒助選團ｘ人老母，你睇鄭泳舜有冇咁笨實？
鄭泳舜成功，以後就跟呢個悶聲發大財加名人效應加數票機器模式同你反對派玩，以後要打選戰，絕對唔容易。唔容易唔代表死硬，只係大家汲取過姚松炎嘅教訓，就唔好做阿寶，即係唔好做重複錯誤。
可能睇到呢度，有姚松炎支持者覺得我事後孔明，好想鬧我。我想講，我成晚睇住點票直播，睇到姚松炎輸二千票嘅時候，真係谷到爆。我都好想呢個人渣政權嘅代理人唔可以咁得戚，所以真心希望下次大家真係要沉著應戰，唔好掉以輕心。就係咁。
而家中華帝國先剛剛進入第二次洪憲帝制，個帝制可以玩幾耐冇人知，我淨係知道一日未死，一日都仲同佢鬥落去。好老土講多句，引用我最喜歡嘅偉人安西教練嘅一句說話：「要是放棄的話，比賽就等於結束了喔」，大家俾心機。