香港係一個好奇怪嘅地方，有班禁煙塔利班，一直唔俾電子煙或iQos之類煙草加熱產品入嚟。我個人未正式住喺歐洲，都未對呢個膠政府嘅偽善主張感到反感，只不過，我喺歐洲見到兩樣嘢後，我堅覺得呢個政府應該執咗佢。
電子煙 危害健康？政府只 care 稅收
先講張圖果樣嘢
香港無呢樣嘢賣，佢係力抗燃喺歐洲賣嘅產品，inhaler，即係吸入器，佢聲稱係解決煙民嘅手感問題，佢係用吸煙嘅方法吸入純尼古丁，只不過，唔駛點煙咁解啫，點解歐洲呢樣嘢賣得，因為歐洲可以賣電子煙以及iQos嘅煙草加熱產品，政府俾佢當藥賣都唔會被人告，雖然喺價錢上，inhaler 係貴過煙草唔少，雖然已經無咗政府徵收嘅關稅。
但有樣嘢仲犀利，叫力抗燃噴霧，聲稱噴咗入口度，六十秒內解決煙癮問題。如果政府俾賣呢樣嘢，唔俾 電子煙 或煙草加熱產品賣，政府仲唔被人JR到上天花板，果陣係藥廠同煙草商都唔放過政府，都可堪稱為史上難得一見嘅奇景。依家大家明點解，香港咁少煙草替代產品賣，根本成班禁煙塔利班，只不過想幫政府保住完全唔合理嘅稅收安排，對於可唔可以真係達致禁煙嘅效果，呢個政府根本係唔理嘅。如果政府真係 care 禁煙，一早有成堆呢啲產品出現，屆時我相信，堅係得自由行班中國遊客至會攞住枝要用明火點燃嘅香煙周圍走。你估煙民，又真係好鍾意二手煙陣味，以及二手煙對旁人以至自己間屋帶嚟嘅不良影響嘅咩。
所以我喺歐洲住咗大半年，我更加認為香港政府嘅電子煙以及iQOs政策，根本係虛偽到無朋友，如果政府係有心鼓勵市民戒甩吸煙呢個壞習慣，應該係八仙過海，各展神通，由藥廠嘅尼古丁替代產品，到電子煙到iQoS呢類加熱產品都放綠燈，而唔係一味只識得加煙稅，結果煙稅只不過係益咗班私煙佬，一如當年美國禁酒，結果益咗係班黑手黨，美國人當年嘅作為，變成咗歷史上嘅一大笑話。其實明明有大把手段可以用，但香港政府都要揀個最差嘅，除咗政府有人自私自利外，我真係諗唔到第二個理由去 justify 政府依家嘅做法。