文：阿灰（業界投稿）
晌今時今日嘅香港，當然對好多人同事睇唔過眼，想佢哋消失。不過如果要先揀啲低層次啲嘅，我覺得有三樣嘢應該即時廢除或踢走：
1. 私隱條例
香港人成日話注重私隱，但係又同時好鍾意用微信、滴滴、支付寶等大陸App。呢啲App將用家所有交易、貼文、圖片、短片、行踪全部儲存及交由中共監控，呢個已經係個公開嘅秘密。基本上你用App去買條底褲、漏夜去邊度買避孕套都成為政府操控大數據嘅一部分。香港人為方便為購物有節扣係可以完全放棄私隱，佢哋仲會大大聲咁話：「唓！我都唔講唔理政治，怕咩喎！」。既然係咁，咁做乜重話自己著重私隱？
另外，晌2016年特首選舉時，選舉事務處存放於特首選舉後備場地亞洲博覽館分別載有1,194名選委以及全港選民個人資料嘅兩部手提電腦懷疑被人偷竊。此事之後不了了之，市民亦全無反應，冇乜所謂。
以上事例，足以證明香港人其實完全唔重視亦唔需要私隱。咁所謂私隱條例仲要嚟做乜? 廢除咗佢啦！
2. 斑馬線
斑馬線呢種制度由英國人引入香港，有效與否全憑司機自律。咁大家話香港司機又有幾自律呢? 我每次作為行人想利用斑馬線過馬路時，雖然已經半隻腳踏入線内，但係大部分司機仍然係「勇往直前」。於是行人只有呆企等車過晒又或者終於遇上善心司機停車讓路先至可以安全通過。斑馬線之功效形同虛設。當我自己揸車時，每次見到斑馬線都會提醒自己，要停車先讓行人。每次停車後見到有行人同我點頭講唔該，我個心又喜又悲。喜嘅係覺得自己做咗件好事，悲嘅係竟然晌斑馬線停車俾人過馬路都算係件好事，乜唔係應該做嘅咩？晌文明國家，唔駛斑馬線啲司機都好多時會自動停車讓行人過馬路，咁香港呢個自稱為國際城市嘅地方，距離文明仲有幾遠？如果文明水準仍然係未夠高，咁斑馬線呢啲高級嘢不如取消啦，費事害死人！
3. 陳港生政協及一眾覺得大陸好掂香港好差嘅偽／藝人
阿陳生或人稱「成龍／蟲」嘅呢件人版，因為香港電影而發達及成為國際巨星。到依傢要顧住大陸條水喉時就不斷貶低香港電影，甚至認為香港電影已經冇咗。香港電影生佢養佢，到佢飛皇騰達時就話香港電影唔再存在。香港電影呢個「阿媽」不論係「出人意表」抑或係「意料之外」唔存在，佢呢個「仔」仲留晌度做乜？阿大哥留晌香港咁委屈，不如快啲返大陸幫共官擦足一世鞋啦！
至於其他靠踩低香港、舐擦大陸上位揾真銀嘅一眾偽／藝人，真係唔該唔好再留晌香港囉，快啲去落藉國内省市，「共」享富貴！
香港攪成咁，其實真係唔怪得人。未代港督肥彭名言: "My anxiety is this: not that this community's autonomy would be usurped by Peking, but that it could be given away bit by bit by some people in Hong Kong." 佢講嘅"some people"，除咗係權貴之外，亦可泛指每一個香港市民。當我哋睇住香港一日衰過一日時，好多人個心好嬲但無力感又好重，話香港冇得救冇嘢可以做。
其實要幫香港唔駛日日走去參加社運、示威遊行，只要晌日常生活做番啲嘢就夠。例如我哋可以撫心自問，你話支持香港電影，咁你上次買飛入戲院睇港產片係幾時？你話香港司機同大陸嘅唔同，咁揸車時有冇晌斑馬線或其他路口先讓行人？你話好唔想香港變成大陸一樣，咁各位手機日日用大陸App時仲係咪寫埋簡／殘體字同用埋大陸語法？大家諗諗。