立即捐款

生活

電子煙:醫護界係唔係真心想控煙

電子煙:醫護界係唔係真心想控煙
廣告

廣告

喺英國,醫護界為咗減省NHS支出,普遍支持電子煙同加熱煙減少規管,但香港唔再係英國一部分後,班醫護界果種公報私仇嘴臉出晒嚟,竟然要求政府禁止 電子煙 或加熱煙,我心諗,喺科學證據面前都可以咁講嘢,你班友係真心控煙定純粹仇視煙商。

首先,我不厭其煩,再貼一次英國NHS喺今年二月嘅獨立報告先,如果醫護界班友咁唔服氣,自己有種就自己喺香港醫管局系統,做大規模獨立研究去研究呢件事,唔係喺度攞啲過期數據(或過期春藥)嚟齋吹。

而英國政府獨立報告最重要一點係,電子煙多咗20000宗戒煙個案(呢個仲要只計 NHS England,唔係成個聯合王國嚟計添),而睇唔到證據係一個年青人吸煙嘅途徑,換言之,電子煙係控煙工具,點解要禁止煙草商自己出控煙工具,最終達致淘汰傳統香煙嘅目的。其實講到呢度,可以睇到香港班反煙塔利班諗乜,佢地以為禁止一切香煙,禁止煙商營運就可以解決香煙問題,所以對電子煙有控煙效果呢個科學證據視而不見,更加唔好講,對煙草商自己出控煙工具淘汰傳統香煙嘅行為加以讚賞,本來電子煙嘅出現,係有助擴大對傳統香煙嘅控制,但實際上,當啲人個腦係塔利班果陣,就會亂咁嚟。

禁絕電子煙不單唔會令香煙消失,相反只會助長犯罪分子,酗酒係一個大家公認嘅社會問題,但點解唔可以透過禁酒,或狂加酒稅去解決問題,大家睇吓美國當年憲法禁酒搞出乜膠就知,果陣幾乎係黑手黨嘅黃金年代,幾多人喺私酒果度搵大銀,最後美國社會都係要對酒類解禁,依家香港啤酒、以及酒精含量低過40%嘅酒係免稅,但有無搞到成堆年青人酗酒,我喺德國呢個飲啤酒如飲水嘅地方,都唔見一街醉酒佬,呢個問題,著力點係控制,而唔係無理禁制。電子煙害處少過傳統香煙果陣,正確做法係喺政策上做到電子煙同加熱煙取代傳統香煙,然後最後戒煙,至少大大減少煙民數目,減低公共醫療系統嘅負擔,呢個亦係大家嘅目標。香港啲醫護界咁諗問題,香港啲煙槍會唔會少咗,我睇唔多會囉。

廣告