如果你問，香港地發展得最好最成熟既係咩？唔洗諗，一定係劏房，一千尺可以劏十間房，每間租八千，月入就八萬，仲好過番工。而家唔只住宅有得劏，就連好多工廈都劏出黎租埋俾人住。聽落係好誇張，但最誇張既係，你又有冇諗過，香港既劏房事業已經又再變出新花樣，劏實體空間唔夠，香港人連虛擬空間都唔放過，全新伺服器劏房，劏開租又得，一層層分開租又得，都咪話唔新奇。
搞創科係大趨勢，而政府亦都成日都叫人去科技園發展，仲話要做「亞洲區數據中心集中地」。所以用廉價地皮吸引唔同數據公司入場，建立一個自用既數據中心，當時就講到明係唔可以分租。但係點知日前爆料就被人發現咗，係將軍澳工業邨既數據中心營辦商HKCOLO，通過三折攞到塊地之後，懷疑將廠房分租出去，姐係變相係度用政府既優惠賺錢，但政府到而家都依然唔理。
香港政府雖然話就話要發展科技，但係最後又係變咗地產既遊戲。係香港地，除了住宅有劏房政府唔理之外，數據中心既地皮都照樣劏出去，政府一樣係隻眼開隻眼閉。再係咁樣落去，仲邊有公司會係香港真心搞科技？咁唔公平，不如大家都去搞劏房啦！
政府用便宜既價格鼓勵科技公司入場原意係好，但係如果任由呢種惡劣既情況繼續存在，對其他用市價投地既數據中心絕對唔公平。而政府作為政策既推手，做好監管本來就係份內事，呢個無王管既情況一日唔改善，不禁令人質疑香港點樣可以安心發展科技。
而家到底有幾多違規公司尚係未知之數，與其等件事愈發愈大，最後真係變到好似劏房咁不可收拾，倒不如趁而家快刀斬亂麻，盡快立定決心做好規管，還香港一個良好的科技發展環境。