從來沒有想過跟公仔箱的球星重遇，仲要係墨西哥……
香港人對墨西哥足球印象，相信只有世界杯，皆因他們每四年就有一次代表作。
在香港，無球迷不知道甘波斯(Jorge Campos)，墨西哥人簡直愛死這個守門員，他們都叫甘波斯”El Brothy”，意思是兄弟(The brother)，雖然他身材細小，但勝在短小精幹，而且彈跳力驚人，很少見佢比人「笠死」，香港人叫他「花蝴蝶」，因為波衫永遠唔係黃就係綠，現任墨西哥國家隊助教，訓練身材高過自己近一尺的守門員。
另一位馳名香港的國腳白蘭高(Cuatemoc Blanco)，本地人簡直對他又愛又恨。在九八世界杯，他憑一既「青蛙跳」(墨西哥人稱La Coachtemina)，迷到萬千球迷。雖然佢係世界杯後被西班牙球會羅致，但因為左腳傷患，私生活又唔檢點，再加上酗酒成性，最後他要回國靠力國內班霸阿美利加(El America)，聽同房Sergio講，他現在還是墨西哥數一數二的球星(但早已被國家隊放逐)。
第三位是前國腳靴南狄斯 (Luis Hernandez)。香港的足球評述員都鐘意叫「士哥手」(Scorers)做「尖刀」，因為上腳唔駛多，總之腳腳到肉，值錢在「一腳入波」，墨西哥人稱靴南狄斯做「殺手」(El Madator)。
「殺手」這個名字，如果放在足球，墨西哥就愛到入心入肺，但放在政治上卻恨之入骨。皆因每七年舉行一次的總統大選，就總會有候選人叮噹碼頭，而且鬥到最後
一刻被暗殺。這種不幸在墨西哥歷史不知出現過多少次。墨西哥人當然不想任何一位兄弟遭逢不幸，但對上一次就在九四年。明年大選，希望又係叮噹碼頭的PRI( Institutional Revolutionary Party) Candidate Madarzo及PRD(Democratic Revolution Party)的Lopez Obrador都相安無事，大家免傷和氣。
第四位是效力Monterrey Rayado的亞里蘭奴(Jesus Arellano)。在九八世界杯，阿叔林尚義叫後備換入，搞到荷蘭風聲鶴唳的亞里蘭奴做「濕手巾」，皆因佢入替前鋒保加狄之後一味「死扭」，係高大中堅史譚面前好似穿花蝴蝶咁左插花右插花，墨西哥人叫阿里蘭奴做「山羊」(西文El cabrito,意思係「等個走字」)。雖然果場佢無入波，但表現光芒四射，荷蘭教練度狄克無奈的表情，我到依家仲歷歷在目。
Rayado的主場就係我就讀的大學Tech de Monterrey(蒙特雷科技大學)運動場，所以我有多機會跟亞里蘭奴相遇。然而，亞里蘭奴跟殺手一樣年華老去，今次現場睇佢落場既表已不複當年勇，最後Rayado同榜尾護級的Altas打成一比一。
後記：墨西哥人都以為亞洲人的面孔是鐵板一塊，個個細眼長髮金毛，就等如香港人叫所有外國人做「鬼佬」一樣。球賽完畢後，我穿過萬千球迷步出球場，不少飲醉左既球迷見到我大叫「Nakata Nakata﹗」，佢地從電視睇到既亞洲人就只有日本球星中田英壽(Hidendosi Nakata)，就好似我來墨西哥前，眼中就只有Campos、Blacno、Hernandez同Arellano一樣。
