余若薇在上政府總部辯論前到立法會外向市民發言。
「六一七撤回政改爛方案集會」下午三點開始。到下午五時，立法會外有二、三百人聚集，這些「hardcore參與者」有什麼想說？
「無論泛民點樣分裂，信念都唔變」──城大社工二年級的秦小姐
讀社工就應該關心社會，為弱勢社群發聲，今次要為民主發聲。年初時有參加反高鐵運動，那是我第一次參與大型社會運動。高鐵雖然過左，但運動是成功的，因為動員了很多人。今次也要彰顯人民力量。無論通過與否，人民都要發聲。現在資訊科技發達，年輕人有平台，而由於社會富裕了，少了現實上的限制，可以講價值。另外，年輕人可以在網絡平台學習外國的行動。至於余若薇和曾蔭權辯論，對我來說，是一場沒有輸贏的政治行動。我好清楚知道企邊一邊，辯論雙方都代表不了自己， 更重要是有第三者的聲音。所有人的聲音都應該被聽到，我黎就係為自己發聲。對政改方案，我點都唔會讓步，就算政改有改動。我有自己的信念，一定要完全撤回方案先得。無論泛民點樣分裂，信念都唔變。六二三一定黎立法會。
「我接受不到點解兩個人不能在公眾面前辯論」──鍾太, 家庭主婦, 一九五幾六幾年.
我是家庭主婦，和老公一齊出黎。政改方案極度不合理，所以要出黎。這場辯論是極度不公平的，我接受不到點解兩個人不能在公眾面前辯論。一直以黎我們都支持民主運動，今次呢個集會係最重要的，因為政改影響所有人。八十後後生仔主導運動，更加應該支持，年輕人犧牲自己，沒有任何既得利益，更加值得支持。今晚的辯論，唔應該睇輸贏，余若薇好被動，不知道會俾人點搞法。我好唔鍾意曾蔭權，佢五年來一d野都冇做過。對普選聯的方案，我極度反對，因為功能組別還要留低。不理今次辯論輸贏，都會反對方案，現在的方案加五席功能組別，除非政府確切地減少功能組別，廢除分組點票，擴大選民基礎。必須符合這三個條件。
「我好憎『政改起錨』四個字」運輸工人陳先生 三四十歲
我路過。今日唔使開工，冇參加過高鐵七一。我好憎「政改起錨」四個字，我係好基層的人，見到呢兩隻字我就好反感，好憎政府做show冇實務。我支持八十後班後生仔，希望佢地將來為我地d基層發聲。今晚辯論，我唔熟悉內容，政府無啦啦叫余若薇做show，根本係做show。我唔贊成政改方案，成個過程是做show，所以一直都好不滿。如果唔使返工，六二三一定會出黎。
「余若薇可以講到激勵人心的說話」──社民連年輕成員john
我在社民連辦事處做野，今日黎派「超錯」貼紙。這次政改是多餘的，政改方案不可以保留功能組別和分組點票。政府一定要撤回方案，一定唔可以通過。政改一定要有民主意義。我要為香港社會做一d正義的事，為公義而抗爭。其實八十後好多是好成熟的人，好多都不後生了。我們不應該被視為不成熟，我們的角色是動員，其實唔係好多野要做：宣傳、影下野咁。參加者來自不同年代，自己的功勞不大，最重要是看參加者。今晚的辯論是一場show，不過透過呢場show都可以睇到d人的反應。另外希望余若薇可以透過辯論會激勵人心，令更多人黎六二三包圍立法會就好。
「年青人愈來愈識做主持社會運動」──退休人士羅伯
我本來在屋企睇電視，但愈睇愈谷氣，決定約埋班阿伯出來抒發不滿。我覺得中央同特區政府一直無尊重同遵守基本法，基本法明明有68條。民主黨方案支持間選，擴大了功能組別，佢地唔應該轉駄，唔應有篩選，應該一人一票選行政長官。對曾蔭權無期望，覺得佢係只識講大話的擦鞋仔，年輕人愈來愈識主持社會運動，佢地係意識到社會不公平先企出來，因為愛香港，而唔係無野做先來攪事。
「六二三會再出來」──退休人士陳先生
今日出來想睇政府對公民黨和市民的反對聲音有咩回應，希望今晚可以理性溝通，縮窄分歧。今次是第一次出席呢d活動，如果要我支持民主黨轉軚，唯一的條件係中央同特區政府承落將來係真普選。六二三會再出來。
「民主黨轉軚要負政治責任」──三十多歲的梁先生
出來話俾政府聽有好多反對聲音，希望政府唔好以為政治就係少數服從多數，政改咁大件事唔可以求其通過就算，應爭取絕大多數人支持。希望今晚講道理，真理愈辯愈明。民主黨轉軚要負政治負任，佢地二零零八年話二零一二年爭取普選，現在爭取唔到咩，應對香港市民負責，佢地對香港仲有咩貢獻？六二三會繼續來，要求俾壓力民主黨唔好轉軚。
香港獨立媒體網實習記者teresa、alex
