「這個不是煙，是加濕器的水蒸氣，我不吸煙了。」Angelababy 動作「俐落純熟」地回應網民。
見多識廣嘅朋友，應該一睇就知，女神手上嘅係iQOS；一款由煙草商推出嘅電子產品。而Angelababy 嘅回應，其實相當巧妙，充分應用邏輯學上訴諸無知謬誤去為事件解畫。正如當年有記者問Baby有無整容，佢答人話箍咗牙；同梁振英回應護老院虐老風波，話呢個係土地問題如出一轍。簡單嚟講，就係九唔撚搭八。
好，就用Baby個邏輯去諗，咁iQOS又係咩呢？「加濕器的水蒸氣」咁講，又真係冇錯嘅，不過並唔係事實嘅全部。iQOS原理係將特製煙芯加熱，釋出水蒸氣混合體，達致傳統吸煙體驗。iQOS產品最大賣點，係由於產品只將香煙加熱到特定溫度，但又未至於到達燃燒溫度，唔會產生焦油，所以無煙臭味，亦唔會對身邊人造成困擾。生產商聲稱，產品比傳統香煙少95%有害成份，減少使用者嘅身體傷害。換言之，假如用iQOS嘅係黃曉明，Angelababy 就算響佢身邊，都冇食到二手煙。
但依家用嘅係Angelababy本人，呢個「加濕器的水蒸氣」搞咁多嘢，其實純粹只係無焦油，但都有尼古丁成份，亦都係煙嘅一種，唔係點頂癮？尼古丁對身體有咩影響，唔我就費事google啦，但Angela個baby仲緊食母乳（好似係），少的化學嘢，點都係pure的，純的。
原本應該一早戒了，還是不捨得的尼古丁。當大家已經唔會天真到以為女神唔使痾屎，但現兜兜咁，睇住女神攞住支煙，再陶醉地吸啜又另作別論。母乳餵哺，係健康人生第一步，Angelababy 仲餵緊奶，尼古丁就真係對佢個Baby健康唔好。其他大人呢，尼古丁 or not 尼古丁，it is a question。Angelababy，雖然你選擇唔到遺傳啲咩俾你個仔，但至少可以選擇餵啲咩俾佢食喎。