【學生義工Ming】
媽媽終於相信我無收錢
「媽媽一直懷疑我參與佔領有錢收，直至她親身到金鐘走一圈，感到每個人充滿熱誠，又有論壇，又自發派湯，如果收錢交差點會做呢啲嘢。」物資站義工Ming早前終於勸服媽媽到佔領區看看。
留守做義工
就讀副學士一年級的Ming，一開始覺得佔中事不關己，認為三子在學生靜坐時宣佈啟動佔中是騎劫。直至9.28，Ming在電視直播看著催淚彈一個接一個，睇唔過眼警方的處理手法，9.29一早就到金鐘聲援，並留守自發組織物資站。
「最初四日夾埋瞓得幾個鐘，時刻準備隨時被清場。」後來形勢不再緊張，物資站工作量減少，Ming不用趕功課的日子就會留守，幫手執拾物資、為遮打自修室加油、拉線駁發電機和音響、派市民捐贈的熱食糖水、做跑腿搬物資等工作。
媽媽覺得我蠢，點解唔收錢呢？
Ming為佔領運動出心出力，媽媽卻懷疑他有收錢，「媽媽問我佔中係咪有錢收，我話冇，佢話其他人都有得收喎好似。佢成日俾人問你個仔有冇收錢呀？媽媽一直抱著懷疑的態度，覺得我蠢，點解唔收錢呢？」
親身到場後頓時改觀
直至早前Ming終於勸服媽媽到場行一圈，「起初媽媽拒絕到佔領區，她覺得自己是中立，不應該落去。我話你成日睇TVB，新聞報導未必全面，最好就是親身到場看看。」Ming媽媽到金鐘走一圈後，頓時對一切改觀，「她驚訝原來現場有咁多人，亦不像電視畫面般危險。」Ming媽媽終於相信他沒有收錢，自此會問他佔領區每日的情況，「以前她不願意聽，現在會主動關心，轉變都幾大。」
打算選修政治學
佔領至今，Ming認為運動繼續落去只會令更多市民反感，應該另覓出路，組織其他不合作運動。受佔領運動的影響，修讀社會科學的他，打算明年選修政治學國際視野，「想多了解政治，了解而家發生咩事，從國際視野的角度了解佔中的影響。」這場運動為年輕一代種下的種子，的確清場也驅不散，留待有日再遍地開花。
（原文載於雨傘鄰里）