在彌敦道抬頭看，不難發現信和商場一樓外牆貼著「香港加油」的字句。有人以為是謝瑞麟貼的，其實這是信和一間手機配件店貼出來為留守者打氣的。
這店舖由三位年青老闆合資，今年 6月開張，本來看準商場人流旺、潮人集中，豈料 4個月後，雨傘運動發生，而信和就正正在佔領區內。三位老闆：Martin、 Bee哥和 Tino一臉無奈，指佔領後自由行旅客減少，人們消費意慾減低，生意額應聲大跌，尤其騒亂翌日，大家擔心安全，都避免去旺角，人流少之又少。儘管如此，他們仍然堅定地支持雨傘運動，Tino更是每星期有三四晚留守旺角。 他們把運動比喻為自然規律:「做生意預左有風險，無得埋怨。」
進行訪問時，信和已關門，老闆一邊安裝新置的櫥櫃，一邊接受訪問:「點解我地揀在香港開（舖），唔在大陸開，就係因為兩地制度既差異。係，大陸租金會平好多，但係消防又 cap 水 (敲竹槓)、稅局又 cap水……香港雖然貴，但明碼實價有得計。支持雨傘運動就係唔想香港變到深圳咁。」
店舖窗口剛好可以俯瞰佔領區情況，老闆目睹的佔領者都很和平，但第二朝看到的新聞竟然和事實完全相反。對於是非顛倒的報導，老闆顯得忿忿不平:「講到佔領者搞事咁，反佔領就好正義。你諗下，正常情況下，反對既人好地地點會去人地既佔領區﹖邊個搞事好明顯啦。」的確，不單是國內，就算身處香港，亦有不少人對旺角佔領區有所誤解。眼見為實，唔該，落黎睇下，比個機會自己去接觸事實。
臨走時，小記想影幾張相做報導，Martin笑言:「舖面可以隨便影，但千祈唔好影樣。正所謂『方丈份人好小器』，政府依家咁樣，真係驚過唔到關（羅湖口岸關口）。」Bee哥和Martin都係香港人，近年因工作關係移居深圳，每星期總要來回港深三四次。「田北俊咁大粒，講句野都比人算賬，何況我地。」訪問後兩天，便有學民義工被拒入境的報導。老闆的擔心不無道理。「但言論自由應該係一個自由經濟既基本條件。」Bee 哥補充道。即使不同身份有不同的顧慮，貼滿整店的「我要真普選」貼紙已清楚表明了立場。
小記離開信和時已經接近凌晨一點，小店老闆仍然在忙；佔領區的留守者仍在堅持。香港加油！香港人加油！