（本文於612之前寫就，想不到一個多月之後，罷工之討論又起，特此重貼。）
全港大罷工，唔係咁易發生。律師呀果啲，講真大家都明，佢地實搞得掂。普通打工仔，手停口停，重有機會被人炒，咁點算呢？
我無咩大道理，但希望可以幫到大家思考件事。
首先，香港《基本法》第27條列明，香港居民有罷工的權利和自由。不過大家都知，基本法都係廢廢地㗎啦。下面會講返法例方面嘅嘢。
響本地法律上面，無論係經濟罷工定係政治罷工，喺香港都無咩保障可言。根據係「防上歧視職工會條例」。條例保障你「參加工會活動」不被追究，腦細唔可以炒你。但前提係，你要響「非工作時間」度「參加工會活動」。（你可能會問，非工作時間點罷工啊？係，而家嘅法例就係咁，法例係幫腦細㗎。但我可以話你聽，只要夠人搞，腦細好少夠膽追究，後話。）而《職工會條例》的確寫明，「罷工」係要「勞資爭議」算係。
咁依兩條法例，表面上定死左政治罷工唔受保障。咁係咪乜都無得做？我嘅答案係「NO！」，只要我哋識得玩，好多野可以做。
法例規定，一個行業或者一個企業，只要有七個人Sign up就可以成立工會。入左紙同埋會章之後，勞工處（重有個部門叫職工會登記局，總之我叫住勞工處先）會畀個籌委會嘅資格你，理論上，你已經可以享有作為工會嘅權利。（即係上面果啲）
咁搞罷工，梗係要響職場度宣傳。咁工會權利就幫到你。
假設一個工會通過左「宣傳罷工」同埋「反送中」作為佢嘅立場，「非工作時間」參加「工會活動－宣傳罷工」，咁你就受到法例保障，腦細唔可以炒你，更加唔可以阻止你。如果你腦細都係反送中，咁恭喜你，應該會更加順利。
要搞得成罷工，就要夠多人陪你癲。佢哋星期日出黎，唔代表可以去到罷工（個個都有頭家）。但係，你諗下，香港有紀錄嘅勞工（sorry，依度未計師奶）係300萬左右，103萬人，當中好多都係打工嘅人，只要佢地行多一步，就係大罷工嘅開始。
咁宣傳完罷工，真係去到罷，腦細話炒，咁點呢？對唔字，好坦白講，你去法庭追，無得打。但係我可以話畀你聽，如果真係搞得成，任個一間公司報復參加罷工嘅員工，佢嘅代價絕對唔止炒你一個。如果有工會，個保障會更加大，起碼我哋可以嘈佢。葉蔚琳搞完罷工之後畀人炒，結果好多人嘈，九巴都將佢復職。
就算員工真係未ready罷工，都有好多嘢可以做，係受到「參加工會活動」嘅保障。新巴職工會就開始呼籲司機按章工作，雖然未係罷工，但係已經拖慢緊個城市運作。無論係集體射波、請假、按章工作、已經係第一步。好似雪球咁滾落去，先會有罷工出現。
咁而家我哋可以做乜？星期日103萬人上街，會唔會係你同事呀？返工時同佢相視而笑，傾下點可以做多一步啦！
依篇文只係想俾個簡單嘅資訊大家，個個都有頭家，罷工係無得逼。但係形勢危急，我哋都無得唔諗。依堆野，12號未必做得切㗎，但係我哋重有時間，大家一人諗多步。
順便講多句，工會有權可以在「勞工界」功能組別度投票，而家果3席都係中共狗工會壟斷，因為佢地工會數量多，票多。如果有「反送中工會」潮，之後會點，我唔識諗，射返個波俾大家。