攝：謝詠芯
話咁快兩年，呢場運動亦都失敗收場，當然歷史裡亦都無乜政治運動可以一次就成功。
不過有好多野唔講就好快唔記得，被遺忘，被扭曲，所以趁記憶還在，筆錄記下。
我想講成件事如何發展成佔領夏愨道八條行車線，之後放催淚彈再發展成之後79日嘅運動，當中最關鍵嘅導火線，我絕對認為係香港警察！
928前一晚重奪「公民廣場」行動，結果係警察清場，74人行動中被捕。
第二天好多人看到這個畫面，唔駛講都自發去到政總聲援。 我也是其中一人，我大約中午時間搭地鐵到達金鐘，在海富中心出口，諗住好似平時咁行天橋過去政總對開嘅添美道。 點知警察好聰明地把天橋封了，自以為唔比人過去集會就無事發生啦，搞掂！於是我只好落番地面係海富中心近肯德基附近睇下仲有乜野途徑可以過對面， 呢個時候我見到熱狗們set咗個帳蓬係都嗌咪，好，咁我就停低聽下你會有乜行動，聽來聽去都係不停鼓催叫人衝出馬路走過對面，但成班人只係縮係帳蓬，無一個人出過嚟。出面夏愨道八線行車，時速7-80km/h，邊有人夠膽衝出去？傻的嗎，所以亦都無人聽佢講。
時間一分一秒過去，嚟聲援既人越來越多，政總天橋繼續比警察封鎖，大批人只好係海富中心停留。呢個時候亦開始有警察係到所為嘅維持秩序。 當中有個警察講：「請大家唔好係到停留，如果你地要過對面，可以往演藝學院方向嘅行人天橋通過。」大家無聽錯係差人叫我地行演藝學院天橋過對面！聰明機智嘅香港警察原來無封演藝學院天橋仲叫人群可以用呢條橋行過去！！！！
當時海富中心已經人多到水洩不通，我亦只好聽警察講沿住好窄嘅行人路往演藝學院天橋，去到天橋都有警察駐守，但真係無封可以通過！過橋後我到了演藝學院對開分域馬頭路嘅行人路上， 到咗呢到警察先諗到要封啦！所以往政總方向嘅班馬線全部唔比人過。 於是當然就係越來越多人逼係呢個好細嘅行人路空間啦。 行人路企滿，啲人就開始要企上花槽， 呢個時候我見到當時學聯嘅義工朋友係到搵大聲公維持秩序。
企係花槽嘅人越來越多，有可多已經企到去面向夏愨道嗰邊嘅馬路邊懸，企係路邊嘅人開始寫咗幾張字牌叫啲駕駛人仕聲援，開始有的駕駛人仕慢車睇下的牌寫乜，亦有人響按和應。 期間有一架車開得好慢，呢個時候我地聰明機智嘅香港警察唔底得頸，竟然走落馬路截停部車查問佢夠境乜嘢事！！咁部車就咁就停咗係到，當然一條車龍就被截停了。
既然差人咁好截停咗㗎車空出了一段馬路空間，一大班逼咗好耐嘅群眾當然受唔到引誘，走晒出馬路啦！就係咁東行四條行車線就是這樣霸佔了，所有人沿夏愨道往添美道方向行過去。
去到添美道口警察已經用鐵馬封了路口，唔比人行去政總，呢個時候西行嘅馬路仲行緊車，我又見返係對面馬路遠處嘅熱狗們仍然「籬」係帳蓬入面叫人衝出馬路佔埋西行線，當然都係得個講字，最後都係東行線呢邊嘅人係扒過石屎壆同埋係肯德基附近嘅人衝出去霸埋西行線。
呢個時候有的走唔切嘅車夾集於人群之中，大家就好合作地讓返一條行車線出嚟比車輛離開。之後群眾聚集係添美道口同係鐵馬後面嘅警察對持，就係咁第一波嘅胡椒噴霧就開始了……
我想講如果當日警察唔係封咗政總天橋，比人行去添美道聚集，我相信群眾都只會好似反國教嗰次咁，係添美道及立法會樓下聚集，唔會謬然地衝夏愨道，如果警察唔係海富中心同演藝學院個邊做成樽頸位，塞咗大量群眾係夏愨道路邊，仲截停車輛比人有空間衝出去跟本無咁易衝出去霸路。
我想記錄返成個過程等人知到，唔好以為成件事好似好有計劃咁，講班廢青受人甚麼外部勢力煽動走出嚟佔中（其實有頭到尾都無佔過中環最多去到大會堂前）。
無呢一班聰明機智嘅香港警察，絕對唔成事。 所以真正煽動人群走出嚟嘅一定係唔理市民嘅舐共香港政府同埋張成件事處理失當嘅香港警察。