南錦賽A組進行第二輪比賽，東道主孟加拉憑中堅Topu Barman喺85分鐘入球以1比0險勝巴基斯坦，連同之前小勝不丹已經有6分喺手，但下場如果不敵尼泊爾而巴基斯坦做低不丹得球又反壓孟加拉咁孟加拉就會出局。
雖然孟加拉U23喺亞運有超水準表現，但英籍教練Jamie Day唔敢用亞運隊踢南錦賽，只保留11位U23球員，中場好波之人Mamunul Islam同前鋒Hossain Rony呢啲重要超齡球員喺返到，目標係重奪失落18年嘅冠軍，所以部分喺亞運踢得幾好嘅U23球員喺南錦賽只能坐上後備席，其中一位後衛Sushanto Tripura嘅表現令我好有印象，孟加拉U23喺亞運大部分比賽以守為主，佢嘅出色欄截係孟加拉可以出線16強嘅其一關鍵。
而Sushanto Tripura都係孟加拉足球界罕見嘅Jumma球員(朱瑪人)，活躍孟加拉足球界嘅職業球員多數都係孟加拉人，Sushanto Tripura係一個另類，朱瑪人只不過係一個統稱，佢哋可以細分Marma、Tripuri、Tanchangya、Chak、Pankho、Mru、Bawm、Lushai等民族，主要居於吉大港山區，朱瑪人同孟加拉人唔同係朱瑪人信上座部佛教為主，孟加拉人就信回教為主，大家有自己語言文化，最大差到係皮膚顏色，朱瑪人屬於黃種人，外觀同印度東北部居住嘅黃種人民族相近。
喺上世紀孟加拉立國後孟加拉政府就鼓勵孟加拉人移入吉大港山區，但由於文化差異大家起衝突，最後死咗好多人。如今孟加拉人對朱瑪人仲有好多歧視，但情況有改善，有啲朱瑪人已經搬去大城市同孟加拉人共同生活，Sushanto Tripura都移居去達卡，佢現時效力孟聯吉大港隊，可惜除咗Sushanto Tripura之外，男子足球好難再搵到朱瑪人，反而女足間唔中都有。