獨媒報道，有荃灣區議員認為荃灣隊喺低組別表現太hea，提及可能會突擊檢查球會訓練，或者用12萬，請兩位港超球員幫拖。
報道一出，立即引起球迷回應，不過聲音兩極。有人認為，區議員理應監察區隊運作，建議唔錯。有人就認為，成班區議員，講緊笑話。
低組別一向係業餘，球員心態可能唔同，有人當出身汗， 有人當聯誼，亦有人去認真。區隊因為身分關係，受到特別監察，係唔出奇。區議員有呢嗰責任，有啲討論唔錯，例如居馬費低。不過有啲建議，例如12萬請兩位港超球員踢一季，就有啲諗唔通。咁講法，嗰兩位港超球員除非係好後生唔使畀銀養家，又或者有錢唔愁生活問題，否則，都要揾正職，可能因為有正職，心態都改變咗未定。而且只有兩位嘅話，對球隊作用，未必太大。
唔少區議員上任後，都好積極關心本土波，而有啲係識波，真係有睇開，例如屯門嘅黃丹晴，亦有啲本身對本土足球毫無認識，更何況係低組別。不過我相信佢哋開會時討論，都會做吓功課先，可能對其唔太熟悉，會得出一啲怪雞建議或言論，真係唔奇。我覺得唔緊要，區議員都係人，一個區議員未必會知道咁多嘢，但佢哋一定要嘗試了解同接觸，佢哋嘅職業就係咁。我都相信，開得會，積極提供建議嘅議員，都係有心嘅人，佢哋有心改變狀況，不過都要抽多啲時間了解本土低組別世界本身嘅運作，唔好諗太多比較有距離嘅嘢。
至於荃灣隊是否hea踢？ 過往我睇嘅荃灣隊，每次嘅表現，我都唔覺得有幾hea，有時仲非常認真。前季對大聯盟，踢到互屌， 飛沙走石火藥味重，後備冇參與嘅球員，都屌埋一分，我真係唔覺得佢哋好hea，只係覺得佢哋球員實力一般般。
低組別聯賽，九成九球員擁有正職，因此球員人腳會變，係好常見。當然，每隊投放程度、投入感，都可以令球隊表現差好遠。低組別聯賽仲有好多問題存在，並非一兩個建議可以改變，有心有權嘅人請繼續關注。
題為編輯所擬