因為有傳聞話中央台唔想影到球迷所以遮住看台，早幾日專登開直播嚟睇吓，佢哋冇用特效遮住看台，當時仲正常，同世界訊號同步，只係慢啲，一樣可以睇到球迷大頭，不過聽聞呢兩日，中央台嗰邊撳掣做嘢，唔畀某啲球迷大頭鏡頭出現。
喺直播途中向看台打格仔遮嘢就冇乜可能，啲畫面轉嚟轉去，一陣間真係唔小心遮埋球員，遮埋自己啲廣告咁就死啦。不過出面就話，呢一兩日先開始係玩閹割版，咁就要睇下，我信自己隻眼嘅。
今日我就同步開Now直播+網上南韓Link同電視廣東體育嘅CCTV 5+直播，其實廣東體育呢邊係慢咗差唔多半分鐘，所以我之前睇Viu免費直播，想睇返入球過程，會即刻轉去廣體或者中央一台，因為佢哋都係慢過Now。
不過慢咁多就係同冇球迷大頭有關？唔清楚。
我揀咗卡塔爾對荷蘭嚟睇，Now嘅直播，訊號畫面同南韓Link完全一樣，鏡頭經常影住球迷大頭，荷蘭同卡塔爾嘅球迷都有。而慢半分鐘嘅廣東體育CCTV 5+直播，成個上半場觀眾大頭基本上只係影咗FIFA光頭佬主席一吓咁多，冇其他球迷大頭出現過。
CCTV 5+版本直播，會用教練後備席嘅大頭代替觀眾大頭，即係話，網上面話呢兩日中央台播世界盃開始處理觀眾大頭嘅消息，係真嘅，CCTV版本直播，明顯係處理過嘅，甚至有一兩下，可能撳掣撳得太過慢，彈咗半秒同埋一秒嘅球迷大頭出嚟。
而直播途中，冇專登將看台蒙蔽打格，佢哋只係將球迷嘅大頭鏡頭，設換做影住教練後備席嘅畫面。
所以呢半場如果睇廣東體育CCTV 5+直播，你反而會成日見荷蘭後備席，前荷蘭國腳戴維斯目無表情嘅畫面。
同步測試之下，證明中國CCTV版直播的確有所不同，同之前已經唔同咗，不過其實喺比賽期間或者一啲慢鏡重温，都可以隱約咁睇到看台上嘅球迷容貌，所以你點遮都係遮唔晒，仲有長期影住後備席，真係好撚悶，我唔想成日睇到戴維斯。
我睇過一套香港嘅電影，入面有一幕係自導自演世界盃決賽，入面有假嘅朗拿度同巴夫斯，有假嘅球迷，仲有假嘅林尚義， 一做嘢就會撳掣插播，甚至仲有假嘅廣告，假嘅廣告女演員(人妖)，不如請班球迷笠哂罩或者著哂大白，預先拍咗啲片先，比賽轉播期間，訊號一去到觀眾大頭，立即撳掣去片，「球迷」揮動五星旗，安全笠罩睇波波，咁起碼都有啲誠意呀，你嘢嘢都係戴維斯，雲高爾，好悶呀！
（本網歡迎各界投稿，文章內容為作者個人意見，並不代表本網立場。）