馬航殘骸喺印度洋西部留尼旺島被發現，令呢個法國海外大區頓時變成網上嘅搜尋熱門地名，但唔知有幾多人知道，留尼旺正在舉辦印度洋島國運動會，呢個運動會每四年舉辦一次，參加嘅國家／屬地包括毛里求斯、塞舌爾、科摩羅、馬達加斯加、馬約特島、留尼旺島及馬爾代夫，其中馬爾代夫派出嘅運動員於七個國家／屬地內最少，2011年個屆就排獎牌榜包尾，對於馬爾代夫而言，足球隊係國家於運動會中嘅最大希望。
雖然馬爾代夫足球近年有進步，但從未試過於印度洋島國運動會足球項目內小組賽出線，今次馬爾代夫國家足球隊失去六個關鍵球員，包括射手艾舒費（Ali Ashfaq），補選嘅球員都非常年青，外界普遍唔睇好馬爾代夫可以出線，因為小組賽對手有馬約特島、馬達加斯加及塞舌爾，其中塞舌爾係馬爾代夫老對手，前年雙方2度友賽，馬爾代夫都輸波收場，果然呢支半Full馬爾代夫國家足球隊首場賽事就以1比3不敵馬約特島代表隊，但第2場賽事馬爾代夫卻擊敗塞舌爾保出線希望。
今次馬爾代夫國家足球隊出戰印度洋島國運動會，被馬國媒體及球迷批評，並非馬國隊備戰功夫不足，因為於選球員方面出現阻力，有球員不滿國家足球隊保加利亞主教練Velizar Popov（波波夫），決定退隊，由於馬爾代夫可選球員唔多，球迷都非常擔心國家足球隊能否出線。
儘管第一場輸畀馬約特島，但擊敗塞舌爾令波波夫極為開心，並稱呢場係過去幾年馬爾代夫踢得最好嘅比賽。對於不和風波，波波夫企得十分硬地講：「關於我同個班好多意見嘅球員，只有兩個選擇，一個係我將徹底清理呢支國家隊，一係我返屋企，就係咁。」（maldivesoccer.com）
若不和風波持續，絕對有機會影響馬爾代夫國家足球隊戰績，如今印度洋島國運動會只係熱身，世界盃外圍賽及南亞足球錦鏢賽至係重點，但波波夫之話亦有道理，馬爾代夫足球需要新血，但佢地更需要嘅係踢多啲比賽。