【獨媒報導】免費報章《am730》一直有傳賣盤，創辦人施永青今早在電台節目表示已告吹，透露曾要求該名潛在買家先落訂100萬：「你攞100萬出嚟，表示誠意大家開始傾正式合約啦。佢開張支票俾我，不過彈咗票。咁無辦法，我本來唔想講，不過你問到我就講。」
早前有報道指，市場推廣公司負責人Edwin Wong 有意收購《am730》，施永青曾表示，賣盤作價希望可達到2億至3億元。本身是中原集團創辦人的施永青，他今早接受新城訪問，被問到收購進度。施永青先反問主持：「應該你都無聽到消息，其實我一路都無俾消息。嗰個表示話有興趣收購嘅呢，就周圍講，佢好高調！」
在節目中，施永青表示，該名潛在買家在表達意願後，「攞唔出實際嘅誠意同埋能力」：「我話你有興趣咪簽份臨時合約先啦，好似買樓，簽完合約先正約啦。」施永青要求對方付100萬訂金，但在收到支票後卻「彈票」。
施永青提到，《am730》的處境自去年第四季起已有改善：「我哋都有虧損，由虧轉盈呀。」不過，他承認「報業難做」，《am730》現時收入仍以線下為主。施永青重申不會放棄印刷傳媒：「因為網媒，俾人印象好碎片化。因為網上嚟睇你㗎呢，唔係睇你份報紙，而係睇你某一段新聞，或者資訊。」
除了質疑網媒碎片化，施永青又認為社會、政府對印刷傳媒的可信性亦較高：「起碼有個編輯部門，去睇吓啲消息真定假，表達能力或者有無偏頗。傳統傳媒都仲有佢嘅價值嘅。」