（獨媒報導）涉初選47人案的前觀塘區議員李嘉達去年刑滿獲釋，重返本地樂隊Forward擔任主音。為了籌備新歌《火之洗禮》，李嘉達和另一成員Charleston亦接受了3個月的跑步訓練，最終成功完成80公里的越野跑賽事。
賽事結束後，Forward在社交媒體發布紀錄片，訪問兩人的參賽者感受。李嘉達在片中提到，完成80公里的感覺「好圓滿、好夢幻」，又說在報名參賽時曾暗自下了一個目標：「如果完成到，自己就可以move on，就可以向前行，就可以forward啦⋯⋯完咗嗰一刻就覺得，真係可以將一啲難受，或者難過嘅事情，都係可以俾佢過去。」
與隊友由零開始一同訓練衝線 冀成為Forward前行動力
Forward周四（1月8日）在Youtube發布一段長約19分鐘的紀錄片，記錄主音卡（即李嘉達）及結他手Charleston在去年11月參與「TransLantau飛越大嶼」80公里男子組越野跑的過程。二人本身沒有跑步習慣，僅用3個月時間受訓備賽。賽事以梅窩碼頭為起點，途徑白芒、昂坪、伯公坳、鳳凰山、芝麻灣等，再回到梅窩碼頭作終點，參賽者須 23.5 小時內完成比賽。
「只想用有限的時間訓練，嘗試挑戰別人眼中的『不可能』，去完成一場屬於我們自己的『火之洗禮』。」不過在比賽當日，兩人出發前已發生「意外」——他們因遲到抵達起點線，較原定開賽時間遲13分鐘出發，成為今屆「最遲出發的跑手」。入夜前為追趕進度，他們加快步程及減少休息時間，未到一半路程已需要服用食止痛藥及噴鎮痛劑。Charleston坦言當下已想放棄，但不能放棄原因是：「好想將呢個挑戰，成為以後Forward繼續向前行嘅原動力。」
攀登上934米高的鳳凰山是二人的最大挑戰。李嘉達說當時愈行愈疲勞及緩慢，感覺沒有盡頭，形容「以為入咗結界」。Charleston則指，賽事進行了接近15小時，他已服用7至8粒止痛藥，每行一步都有如被刀割的感覺。二人逐漸拉遠距離，在前的李嘉達希望與Charleston一同衝線，但亦怕未能及時完成比賽，陷入兩難；腳傷在後的Charleston則指李嘉達是代表Forward精神，稱「就算我唔能夠跟隨其後，你（李嘉達）都要衝線先」。
最後不足5公里路段，僅剩餘17分鐘。Charleston為追上李嘉達，強忍腳痛用最快速度跑：「痛到冇晒知覺，我淨係知阿卡（李嘉達）喺前面等我，我一定要追到佢，我一定要追到佢一齊沖線，所以我唔理一路好痛好痛，我都要繼續頂硬上。」最終二人成功在梅窩碼頭會合，在早上7時56分39秒拖手衝線，相擁完成80公里越野跑的挑戰。
透過比賽放下難受過去 信「努力嘅人係唔會輸」
對於成功挑戰80公里越野跑，李嘉達直呼感覺「好圓滿、好夢幻」，指報名參賽時暗地給予自己目標：「如果完成到自己就可以move on，就可以向前行，就可以forward啦」，坦言賽事進行途中已開始放下一部份，「但完咗嗰一刻就覺得，真係可以將一啲難受，或者難過嘅事情都係可以俾佢過去」。
Charleston則表示，最大得着在90日內完成很多人眼中不可能的事：「冇諗過每日好可以堅持練跑，最尾係好痛好辛苦嘅情況下完成比賽。所以人嘅意志力非常之強大，唔好俾現實去呃到你，努力嘅人係唔會輸」。
今次挑戰名為「火之洗禮」，與Forward尚未發布的新歌同名。在片中，李嘉達透露「火之洗禮」的意思：「其實老土啲講就係信、望、愛三樣嘢……嗰啲嘢唔係真實存在，而係一種透過相信去成立嘅一件事。過程中會有很多難關，告訴你『其實你可以放棄唔使跑，因為你跑完個比賽都唔會有獎金』，好多呢啲魔鬼聲音話俾你知可以放棄。但係你承諾你決定咗去做一樣嘢，你相信自己去做呢樣事嘅原因，有個信念要完成呢個比賽」。
