（獨媒報導）涉初選47人案、被控串謀顛覆國家政權的前中西區區議員梁晃維，去信予兩歲大的貓咪，祝牠生日快樂。他嘆自己因為還柙逾一年，在貓咪生命中缺席的時間比陪伴牠的時間更多，籲貓咪在自己重獲自由前「乖乖地聽媽媽同太婆話」，又指從相片中留意到牠肥胖不少，希望牠控制食量。
梁晃維Facebook公開梁今月初寄給貓咪的信件。梁在信中稱貓咪為「我最愛的女兒」，並為今年再次缺席牠的生日會而抱歉，「只能從遠方向你送上祝福，默默咁，由照片之中睇住你嘅成長」。梁透露，自己在過去一年哭得最厲害的，是收到牠去年生日會相片的時候，指自己「不禁諗點解自己無法出現喺呢啲照片之中，明明只要有多一星期，短短一星期嘅時間，我就可以陪你渡過你嘅第一個生日」。
梁嘆，在貓咪兩歲之際，自己剛好離家一年：「即係從現在，到我能夠重獲自由為止，我喺你貓生之中缺席嘅時間，將會超越我喺你身邊嘅日子。」他指，每當想起貓咪日後會否不認得自己、會否忘記一起瑟縮於被窩的日子等的問題，就會非常不安，因害怕無論是貓咪，「定其他我所愛嘅人、重視嘅人會隨時間慢慢習慣我嘅不存在」。
不過梁指，自己只期望愛貓能夠健康成長，又提到在欠缺自己與貓咪做運動的情況下，透過相片留意到牠「肥咗唔少」，籲牠好好控制食量，「唔好用冬天啲毛長咗做藉口」。梁又表揚貓咪「趁媽媽wfh嘅時侯都有好好陪住佢」，著牠「繼續乖乖地聽媽媽同太婆話呢，咁樣爸爸就安心了。請保重身體，爸爸永遠愛你。」