【獨媒報導】今日是政府安排宏福苑居民上樓第六日，宏仁閣居民2502室樓張先生落樓時，只手持一個尼龍袋，裏面裝住父母留下來的「鐵罐」。他表示早前透過「一戶一社工」提供相片，已經得知單位被嚴重燒毁，「已經預咗輸」。上樓後，張先生打開父母收藏逾60年的「鐵罐」，發現裏面裝有數片大花膠，立即笑言「驚喜！咁個廚房無價值嘢㗎嘛，廚房就係燒淨嗰忽仔，就啱啱有呢件嘢」，但指如果有機會亦不會上樓：「因為啲嘢執到七七八八」。
居民帶「大悲水」盼兔仔早日投胎
顏女士一家四口居住宏仁閣3102室約四年，屋企已燒得頹垣敗瓦，但一家人落樓時仍笑容滿面接受傳媒訪問。
顏女士稱「啲灰多到太誇張，完全已經無心機搵……基本上所有都搵唔返，基本上都燒晒啦，阿仔啲證書、獎項呀，全部都冇晒，總之就係好惡劣。」幸好最終先生成功拾回兒子小時候戴的玉鈪及「金佛仔」，笑言「老公唔知點解即係突然間喺嗰堆灰度，掘返出嚟咁即係天意囉」。
他們養了4年的兔仔「阿妹」火災中離世，顏女士嘆找不回遺體，今次上樓帶了朋友給的「大悲水」，希望噴灑後「阿妹」能早日投胎。
顏女士提供兔仔「阿妹」生前的相片
購自耶路撒冷的花樽
有年邁長者無法行樓梯，居住在宏仁閣29樓78歲林太，只能託女兒及女婿上樓，他希望政府重開一部升降機，協助長者及行動不便人士回家，又指如果再安排上樓，「我就希望搵兩個關愛隊同我上去，幫我攞啲重嘅嘢落嚟。」
林太在訪問期間取出紙巾拭淚
林太列出了長長執拾清單予女兒，包括耶路撒冷花樽及葡萄牙公雞牙籤筒，卻被女兒笑「啲唔值錢嘢都要攞。」不過對於林太而言，這時皆是「無價寶」，其中花樽是30多年前與丈夫一家人到中東旅行時購買，認為今生未必會再到兩個地方，「我哋呢咁嘅年紀 ，keep親啲嘢都係應該有個價值有個紀念，但我上唔到無辦法啦」。
林太是以宏福苑「天地開初」時購入單位，仍記得當初揀選座向的畫面。林太望向宏福苑眼泛淚光「我以為可以喺度過老，以為可以喺度終老」，又稱「我哋兩個要求又唔多，諗住有機會就enjoy live，簡單live。」