宏志閣住戶黃小姐（資料圖片）
（獨媒報導）政府昨天公佈，宏志閣已獲超過四分三業主簽署接受收購建議信，將納入長遠居住安排方案。《獨媒》訪問三名希望返回宏志閣居住的居民，收到最新消息後，他們想法未變，現在仍不願賣業權。宏志閣收購限期為6月30日，居民黃小姐批評政府提前公佈數據，如「出口術」令業主感到壓力，用輿論影響業主決定。
財政司副司長黃偉綸昨天交代宏志閣安置，提到不少業主都有心理陰影，不想返回居住。宏志閣業主、遺屬蘇曉峯覺得「奇怪」：「你覺得我哋有心理陰影，但你就掟我哋去頌雅路西（安置），嗰個墳地嚟㗎喎，我諗應該仲大陰影，呢樣嘢係匪夷所思。」蘇先生亦不滿合安明言業主大會不討論賣業權，「我哋開會就係要討論呢樣嘢，最當前急務就係呢樣。你唔傾開嚟有咩意思？」
上樓當日，黃小姐在窗口貼上「愛宏福」字句。
批維修費不清晰、至今不知保險索償詳情
黃小姐說，對於政府最新消息感到難過和憤怒。她說本身已有心理準備，當局會在630期限前公布將宏志閣納入收購方案，但她目前仍認為當局公布的數字不夠清晰、不知從何而來，加上合安沒交代三千萬的維修費用詳情，所以暫時不會賣業權，會繼續觀望：「你冇話我知點解要維修、點解要三千萬，又放風話要業主負擔成筆費用，但其實保險會唔會cover到一部分 ？claim保險情況係點？又唔公佈。我冇呢啲資訊，我棟樓又冇燒，點解就要去簽約然後賣俾你？」
黃小姐坦言，知道身邊有街坊已簽署信件，同時也有部分人未簽，故難以認證政府公布的數字。她認為，最清晰和公平的做法是在業主大會上討論和投票，了解多少人想原址重建或維修其中數棟樓：「我棟樓冇燒，對面棟樓又冇事，隔離棟樓又唔係燒得好勁，如果真係有一啲街坊想返去住，可唔可以話我哋知維修幾棟要幾多錢同時間？」
指開會議程應由業主訂立 若不討論賣業權「同簡介會有咩分別？」
不過，合安昨日公布有信心在7月舉行業主大會時，特別提到不會處理「個別業主」出售業權事宜。黃小姐質疑，業主大會本身應由居民自行訂立議程、討論居民關心的事項，但現時合安無諮詢居民意見，已自行決定不討論賣業權一事，做法沒意思：「咁同之前嘅簡介會有咩分別？唔瞭解情況嘅人就會覺得佢開咗會，但原來佢開嘅會係冇意思嘅，講嘅嘢可能完全唔係我哋想知道嘅嘅，或者我們已經知道嘅嘢。」
她亦相信，合安是刻意待首個收購期限6月30日過後，才舉行業主大會：「其實已經拖咗好耐，政府有責任推動佢去開會，但我唔見政府有出聲。我完全唔理解，又話要物色場地，又話搵唔到我哋，但賣樓嘅時候又會搵到我們。」
宏志閣業主、遺屬蘇曉峯（資料圖片）
居民指提早公布數據或左右街坊決定
雙親在宏昌閣罹難的遺屬蘇曉峯同為宏志閣業主，過往一直希望原址重建。得悉數據有否覺得失望？蘇先生表示「預咗會咁公佈」，雖尊重不同人意願，不過對數據可信性有保留。他憂慮當局提早公布數據，會左右居其他民決定：「有啲人十五十六，覺得出咗數據，要有個決定，我都要賣喇喎。」
提早看到收購意向，會否影響自己立場？蘇先生表示暫時仍然不賣業權，「其實我都係想喺呢個地方，搵返自己一啲回憶」。
合安在簡介會提出，宏志閣維修費估算為3000萬元，但未確認由誰承擔，蘇先生認為金額會成其他業主卻步因素，但認為理應可以由保險賠償、善款補助，卻未有交代，「其實保險應該已經可以cover晒。」他指就算由居民分攤，每人平均支付約12萬，加上合安退回約6、7萬元維修費，自己願意負擔：「其實我哋比6萬就返得去住，出去買過間屋，裝修個廁所、廚房都唔止呢個數啦。」
回應「陰影論」：住頌雅路西仲大陰影
財政司副司長黃偉綸昨天表示，不少業主都有心理陰影，不想返回宏福苑居住。蘇先生覺得「奇怪」，提到安置方案中，大埔的唯一選址頌雅路西，附近為殯葬區，「你覺得我哋有心理陰影，但你就掟我哋去頌雅路西，嗰個墳地嚟㗎喎，我諗應該仲大陰影，呢樣嘢係匪夷所思。」
政府又提到或明年立例收回餘下業權，蘇先生質疑，「值唔值得因為宏福苑一個屋苑，將遊戲規則完全改變？咁以後邊個夠膽買樓呢？」
頌雅路西選址（資料圖片）
指業主大會應議決宏福苑去向
與黃小姐一樣，蘇先生同樣不滿合安稱業主大會上不會討論賣業權。蘇指聯署業主清楚要求議決宏福苑去向，即包括售賣業權予政府、參與政府樓換樓計劃、原址重建或重置。他批評「我哋開會就係要討論呢樣嘢，最當前急務就係呢樣。你唔傾開嚟有咩意思？」
他認為大會拖延到7月舉行已經太遲，「其實街坊真係希望知道究竟多唔多人賣樓，係希望業主會表決。」但即使已過首輪賣業權限期，蘇先生都認為仍需議決安置方案，「我哋都希望知道居民意願，究竟係咪78%？你而家意向書嚟，理論上冇法律效力。」
他強調另外七座大廈，包括其父母居住的宏昌閣，都需於大會交代驗樓報告，「要比多啲數據去支持要人賣樓」。「成日收埋驗樓報告唔公布，呢個報告影響好多街坊決定我留唔留低，好似宏建燒咗一個單位，就話成座要拆，唔係好make sense。」
宏福苑（資料圖片）
批死線前公佈「玩心理戰」
N小姐（化名）在宏志閣成長，一直希望家園可得以保留。她形容昨日見到數據「愕咗一吓然」，說計同昨天，到6月30日還有3個工作天，「仲有幾日，你突然間公佈出嚟，玩心裡戰咋嘛！本身唔賣嘅人，喂又咁多人賣，你好賣喇喎！」
N小姐指群組很多街坊都質疑政府公佈的數字，不太相信會有七成七街坊賣業權，她認為政府應公開「邊家邊戶簽咗」。N小姐又認為收購建議信只是表達意向，並不作準，「始終佢哋未簽買賣，收咗意向唔係真係買咗。」
至今未拆收購信
不過N小姐表示暫仍不打算賣業權，「你開放特設銷售計劃係你嘅事，唔代表我要賣。」她指至今仍未拆開收購意向信，「我拆都未拆，本身冇諗住賣，拆乜鬼啫，我攞住封信就係話比人聽，你唔可以代表我，我冇簽到，大大份嘢仲喺我手上。」
圖由N小姐提供
促交代再上樓
合安宣布7月有信心開業主大會，政府同日就公佈賣業權數據。N小姐說自己一日未賣業權都有權出席業主大會。她批評7月才開會「一定遲啦。4月已經叫你開會，正常都冇理由拖到last minute開，唔係小事嚟」，批評合安違反法例「離譜」。她也對合安可否順利開會有保留，「佢話有信心，但呢個世界上有個term叫有心無力。」
現在宏志閣前路未明，N要求再上樓，不滿政府一直未有回應。她指自己兩次上樓都「冇諗住我返唔到屋企，咁而家我返唔返到屋企都好，我係咪應該執嘢先，就算佢真係要逼我走，最低要求、最起碼都要比我搬返啲嘢走。」宏志居民第一次上樓限時1.5小時，第二次為3小時，N小姐明言不足夠，「4.5小時對一個未燒單位嚟講其實仲要好多嘢要攞，之後點開放、點攞，冇消息講。」