【獨媒報導】宏福苑居民今日繼續上樓執拾，妻子在大火中不幸罹難的葉家駒，早上到兒子宏昌閣的家執拾。兒子阿霆接受《獨媒》訪問時一度哽咽，稱執拾期間夾雜着憤怒、不開心，尤其要踩着家中部份物品，包括在大火前才新添置的衣物才能執拾：「冇人會想踩住自己屋企嘅嘢⋯⋯所以⋯⋯係囉⋯⋯係會有啲唔識點樣去形容。嗯，呢個我相信唔會係⋯⋯一個正常人接受到嘅事。」
葉家駒與妻子白瑞蓮自2003年搬入宏福苑，居住在宏泰閣1701室，葉家駒的阿霆與妻子則居住在宏昌閣。在去年大火當日，葉太拍門通知鄰居火警，不幸未能及時逃生遇難。
在完成執拾後，葉家駒與兒子下午將物品寄存到迷你倉，兒子阿霆接受記者訪問時，身上仍然傳來火場殘餘的氣味，上衣更有少許泥濘。
圖片由阿霆提供
單位情況較預期惡劣 取回亡母予妻首飾
在今早重返屋苑的時候，他們經過宏泰閣才到宏昌閣，阿霆形容「呢段路唔係幾好」：「係一個面目全非嘅地方，只能夠係一路望清楚依家嘅狀況環境，想像唔到喺入面嘅人係點。」他有感屋苑情況兩極，部份單位看似沒有大礙，「望清楚呢個地方依家成為點嘅樣」，當時反而沒有太多情緒，只有唏噓。
圖片由阿霆提供
他們早前收到「一戶一社工」的相片，阿霆在進入單位後有感情況較預期惡劣，廚房更已「燒到爛晒」，形容是total loss，大廳的公仔部分更已溶掉，衣服散落一地，只有部分物品能取回。
被問到是否能取回亡母的物品，阿霆稱與家人預先作分工，太太負責取回母親留給其的首飾、鑽石手鏈都幸運地尋到，即使表面有少許燻黑，「整體結構冇咩問題」，另成功尋回其他有價值的物品，包括愛犬的紀念水晶。
圖片由阿霆提供
步入大廈樓梯時心情沉重 邊嘆氣邊執拾
阿霆稱在步入大廈樓梯時心情沉重，到達門口的時候需要梳理情緒，並喚自己要冷靜下來，入屋後心情更為複雜：「我同一時間要搵嘢⋯⋯然後要望，好多嘢都冇晒，同一時間要處理幾個人嘅情緒。」
如是者，阿霆只能一邊嘆氣一邊執拾物品，在開始尋找物品後便喚自己「唔好諗住」。他形容感覺很難受，即使該單位不是居住了太久，但居住在宏福苑多年：「我倆口子花咗咁多心機喺呢個地方，同時間變成一個咁樣嘅廢墟。」
在執拾期間，阿霆夾雜着憤怒、不開心。他在訪問期間一度眼濕濕，指家中部份物品，包括衣物在大火前才新添置，如今卻要踩着來收拾：「冇人會想踩住自己屋企嘅嘢⋯⋯所以⋯⋯係囉⋯⋯係會有啲唔識點樣去形容。嗯，呢個我相信唔會係⋯⋯一個正常人接受到嘅事。」
強調不會向屋企道別 「呢個係我嘅地方嚟」
對於執拾時間只有3小時或許較匆忙，阿霆認為「多多都唔會夠」，但就只能盡量調節心情：「你要限時限返屋企，係一件好荒謬嘅事，你話安全理由冇辦法。事情發生咗，面對嘅只能夠去面對，喺有限嘅時間分配要做啲咩。」
不過，阿霆表明不會向自己屋企道別，「呢個係我嘅地方嚟」，希望有機會能再次回家：「如果同我嘅屋企道別，咁我嘅屋企喺邊？我嘅屋企就喺度，我點樣道別啫？」他苦笑稱，「返屋企」本身是看似正常的事，現在卻要艱難地才能回家，是十分奇怪的事。
從單位望出街外感陌生 離開前再「望清楚自己屋企」
在執拾期間，阿霆從單位大廳的窗望出街外，但景觀已面目全非，「係另外一個景」：「睇落去好似好熟悉，但係感覺好陌生。」在完成執拾後，阿霆在單位門口靜靜地看了一會，「望清楚返自己屋企究竟依家係咩樣」：「睇清楚狀況去到邊，始終依家呢一刻要離開。唔知會唔會再有下次，呢段時間我哋可以做嘅都盡量去做。」
宏泰閣居民獲政府安排下周執拾，葉氏三父子屆時將要再次回到父母的家，阿霆聞訊稱「嗰個都係自己屋企」：「加上媽咪嘅關係，相對要有一定嘅心理準備。」他指父親的單位相對嚴重，「要有另外一個準備應對」、「今次可以話係預習」。
談到未來計劃，阿霆稱「未諗到」、「未想像到點處理」，因為不少後續事情未能解決。然而，阿霆指既然事情已經發生，會努力向前行，期望聽證能替宏福苑居民尋回真相及公義。