【獨媒報導】大埔宏福苑居民今日繼續分批上樓執拾，居住在宏昌閣的郭先生月初腳部受傷，早前曾向社工提出改期，惟僅獲回覆「會積極安排」。郭先生今天以雙手支撐拐杖堅持上樓，稱「驚錯過呢次之後冇機會上去」，此外 郭先生的父親在一年前去世，他希望重返單位能帶走其遺物，並多看看先父生前經常逗留的客廳。
宏昌閣5個樓層及宏仁閣10個樓層的街坊今日獲安排上樓。居住在宏昌閣7樓的郭先生，他在月初絆倒弄傷腳，腳趾骨粉碎性骨折，需要以雙手撐拐杖走路。
腳傷欲改期無回音 社工：會積極安排
他曾向「一戶一社工」詢問上樓日子可否改期，獲對方回覆「會積極安排」：「confirm唔到，我就唔搏啦，因為驚我錯過咗呢次之後我冇機會再上去。我如果得一次機會嘅話，我用呢一次機會上去，比起我會唔會整親隻腳會重要少少。」郭先生今日同撐著拐杖，由三名朋友陪同上樓。
郭先生接受訪問時表示，如果能推遲兩周上樓，「康復多啲我上去會舒服啲」。他早前已接受物理治療，亦試過行樓梯練習，在衡量過後認為能行七層樓梯回家。不過，他坦言回到單位後主要「做指揮」，要由朋友代勞執收搬運，對方亦要帶備摺凳，讓其有需要時可歇息，又指當局已安排有需要的話，可讓其坐輪椅到宏昌閣。
望取回父親遺物 帶走使用多年水壺
另外，郭先生沒有收到單位照片，遂估計單位狀況尚可，上樓希望能取回有紀念價值的物品。他指父親在一年前去世：「佢日常用嘅嘢，佢去咗之後，我都冇特別掉，屋企會有佢嘅感覺。」
郭先生續指「全間屋都對我好重要」，希望上樓期間能多看看客廳位置，指爸爸晚年無法到處走動，常常坐在客廳看電視。他亦向記者分享生活點滴，希望帶走自十多歲便開始使用的水壺：「有啲污跡，老豆會搵啲唔知檸檬汁、梳打粉清潔，本身黃咗又會清潔返，有好多回憶喺入邊。」
宏福苑對郭先生來說滿佈回憶，他在宏昌閣斷斷續續居住近30年，單位在大火期間正值裝修，一家四口和工人原打算在裝修後搬入單位。郭先生又指與鄰里關係密切：「80後（細個）會出走廊玩、一班小朋友落街玩。好似全部小朋友，就係全部會落街嘅街坊嘅小朋友。」
郭先生提供圖片
宏昌閣居民上樓感忐忑 「隔離左右上咗天堂」
另一名宏昌閣居民、居住在8樓陳女士同表示，沒有收到單位相片，估計單位損毀不嚴重。她擔心上樓梯會較辛苦，但指有親友從旁協助，最希望取回從外地買回來的公仔。
然而，陳女士不諱言心情忐忑不安，「我隔籬左右上咗天堂」，她已帶同鮮花悼念鄰居。