【獨媒報導】宏福苑居民連續第九日上樓執拾，居住在宏昌閣30樓的崔先生，他在落樓後表示，在自己的單位內發現大批不屬於其的物品及垃圾，更有數條香煙。他對此感到十分憤怒及詫異：「唔被尊重，我第一時間有個疑問係，工人係咪以為我已經死咗？佢收到啲錯誤資訊，個戶主已經死咗，個單位冇人返上嚟㗎啦，其他單位啲嘢就可以堆晒過去。」
宏昌閣住戶崔先生在落樓後接受傳媒訪問，指整間屋變成灰，連玻璃櫃亦變成玻璃結晶。然而，崔先生表示，在單位內發現不屬於自己的物品，相關物品的紙箱、信件更清楚列明屬於其他單位，並向記者展示相片：「嗰啲嘢喺我個單位度係堆積如山。」
圖片由崔先生提供
居住在宏昌閣30樓的崔先生，他形容該些「垃圾堆的物品」充斥在其單位內，入屋後不知道如何尋找屬於自己的物品，警員及後將垃圾移到一旁。他坦言，該些不屬於自己的垃圾阻礙執拾，令三小時的收拾時間捉襟見肘。
居民：我個單位係被人當咗一個垃圾站
在接受訪問時，身高1.93米的崔先生顯得憤怒，指單位的廚房嚴重焚毁，但同樣擺放大量垃圾：「既然政府話係危險區，點解仲可以存放一啲唔係我單位嘅垃圾，堆到一個人咁高，我要擒入去、爬上去。」他表示從未在新聞獲悉同類情況，「我個單位係被人當咗一個垃圾站」、「我係搵唔到屬於我嘅嘢」。崔先生關注，鄰居是否知悉其物品落入其他單位。
圖片由崔先生提供
此外，崔先生更在單位內發現數條香煙：「我屋企唔食煙㗎！但有幾條香煙，有一啲全新嘅口罩，有各樣嘅食品、水樽，明顯地係一啲工人進行休息、飲食嘅痕跡。」
至於是否有失竊情況，崔先生稱由於能找到的物品不多，並且要撥開垃圾才能執拾物品，「我落樓一刻亦都未能夠清空屋企垃圾」、「所以我答你唔到」，表示已向警員及社工反映。
入屋後感憤怒 成功尋回妻子婚戒
崔先生稱看到「一戶一社工」的相片時已百感交集，因為家中已接近全數焚毁，在上樓看到屋企滿佈垃圾後，感到十分憤怒及詫異：「唔被尊重，我第一時間有個疑問係，工人係咪以為我已經死咗？佢收到啲錯誤資訊，個戶主已經死咗，個單位冇人返上嚟㗎啦，其他單位啲嘢就可以堆晒過去。」他反問「我都要搵嘢㗎」：「你堆晒人哋啲嘢喺我單位度，點搵？」
不過，崔先生成功尋回少量金器，與妻子的結婚戒指，但可惜未能找回求婚戒指。他另取回一隻焚毁的煲留念。此外，他又取回多部已經碳化的iPhone，但未能估計具體損失：「好彩同屋企人都出咗去， so far人冇事。」崔太則表示，即使尋回結婚戒指，但估計已不能「戴上手」，因為同樣已經碳化。
同居住在宏昌閣30樓的張小姐，他們一家是崔先生的鄰居。她表示家人是單位的第一代業主，母親在30年前因病過身，希望上樓執拾媽媽的遺物，「相片嗰啲真係影唔返㗎啦」。
不過張小姐稱剛從鄰居崔先生知悉，自己家中的雜物完好無缺地被放置在對方家中，「都想問下究竟咩原因？」