【獨媒報導】宏昌閣、宏道閣部分樓層居民今日獲上樓，居住在宏昌閣22樓的李太，其丈夫及愛犬不幸在大火中離世。李太今午與兒子、女兒及媳婦上樓執拾，她受訪期間感觸落淚，指丈夫被困火場未能逃生，在生命最後兩小時與家人保持通話，先生在最後關頭對她說「我愛你」：「佢嗌咗我個名，我好愛你呀⋯⋯我跟住同佢講⋯⋯我都好愛你，佢好少講『我愛你』呢個字，所以係最後遺言，你真係好好咁同佢哋生活啦。」
政府今日安排宏昌閣5個樓層，及宏道閣10個樓層居民上樓執拾，李太今午與兒子、女兒及媳婦一行四人上樓執拾，其62歲的丈夫及飼養了11年的柴犬Bobby同在大火中不幸離世。
攜帶鮮花石頭上樓 望放下重擔釋懷過新生活
李太今午攜帶鮮花及石頭上樓，希望以鮮花悼念丈夫及愛犬，石頭則代表放下重擔，以釋懷過新生活：「石頭代表咗將呢一份嘅重擔喺嗰度放低，唔好再攞啦，唔好再擔起啦，重新過新嘅生活。」
宏昌閣在大火中率先起火，兒子指自出生起便住在宏福苑，今年剛好30年，但坦言「唔期望可以搵到啲咩」，但希望取回父親及愛犬的遺物：「即使係燒爛咗嘅物件，睇吓可唔可以搵得返。嗯，對我嚟講有種遺憾係，我唔敢睇爸爸嘅遺骸，所以我都係需要俾自己一個儀式。」
丈夫喚好好生活、好好照顧家庭
李太指丈夫及愛犬在單位內的主人房離世，並憶述在大火發生的時候，家人陸續回到宏福苑外，女兒率先到達並與父親透過電話保持通話：「叫佢快啲落嚟但已經落唔到嚟，啲火已經上咗去。」
不過，李太表示十分感恩，因為仍能與丈夫在生命最後兩小時相處：「先生叫我哋好好生活，好好照顧家庭，最後5點幾、6點失聯。」李太指丈夫在通話中問道：「啲火入晒嚟，消防員喺邊呀？」她只能回應說「上緊嚟㗎啦」：「但佢已經話唞唔到氣，喺間房已經躺平咗。」最後，丈夫在當晚近6時失去聯絡。
感觸落淚憶丈夫說「我愛你」
在接受訪問期間，李太一度感觸落淚，指丈夫在最後關頭說「我愛你」：「佢嗌咗我個名，『我好愛你呀』⋯⋯我跟住同佢講⋯⋯『我都好愛你』，佢好少講『我愛你』呢個字，所以係最後遺言，你真係好好咁同佢哋生活啦。」她又憶述，丈夫已接受未能離開火場的事實，所以在電話中顯得平靜，爭取時間與家人通話。
對於上樓執拾，李太表示不抱任何期望，唯一希望能取回為兒女儲下的金飾及一隻名錶。兒子最後稱，在回到主人房的時候難免猶有餘悸，他聲音顫抖說，「始終嗰度都生活咗30年」。