（獨媒報導）狗主在7月9日起可帶狗隻進入獲牌食肆，食環署在6月12日公布1,000個「容許狗隻進入處所」牌照抽籤名額，並在上周派員向中籤食肆發出批准信及講解牌照須知。《獨媒》走訪兩間皆不足十張枱凳的中籤小店，負責人不約而同指未必有助生意，串燒店老闆直言「可能會少咗添」，認為仍有很多人不接受與寵物共同進食。另一間本身為寵物友善的Cafe，為了方便狗主而申請牌照，老闆亦稱明白有客人怕狗，但寵物客及普通客之間無可避免要取捨，實施前亦做足準備功夫，盼盡量做到「人寵共融，互相尊重」。
串燒小店申狗牌原意非賺錢 老闆：覺得迫不會勉強
位於長沙灣福榮街的「串皇」是幸運兒之一，餐廳是家庭形式經營的街坊小店，提供串燒、碗仔翅及油渣麵等港式小食，店內有8張餐枱，同時可容納約20人，牆壁及門外玻璃窗掛起老闆的貓狗相片。老闆娘Pat向《獨媒》表示，得知中籤一刻非常開心，笑言「因為好難得先抽到㗎嘛，都冇諗過抽得中，通常呢啲咁好彩都冇我份嘛」，食環署職員周二已落舖派批准信，並解釋相關規例及守則。
Pat明言，申請牌照原意並非增加生意額，僅單純本身喜歡寵物，她稱「都冇特別諗㗎喎，生意可能會少咗添，因為仲有好多人唔係好接受同寵物一齊食嘢。」Pat明白有人天生害怕或討厭狗隻，將盡量劃分用餐區域，「我哋都會盡量隔開佢，或者寵物嗰啲盡量坐入面，冇寵物嘅盡量坐出面」，另會按《2026年食物業（修訂）規例》的要求，在牆上安裝掛鉤，方便狗主將狗帶繫在鉤上。
她指獲許可證後，食環署一定會加緊落鋪巡查，但明白實行新規例初期當局會較為緊張，「因為始終係新，一定會比較緊少少，正常嘅我都覺得係，要開頭做得好，先至可以一路做落去，即係你個頭做得唔好又點樣一路行落去呢？」Pat不太擔心食環檢查衛生狀況：「衛生方面同之前一樣照行照做，只不過多咗寵物嘅條例遵守」。
「串皇」店內空間細少，再接待寵物會否很擠擁？Pat則指面積已是既定事實，如果客人覺得擠迫亦不會勉強，又不擔心「一狗一人」佔用座位，笑稱「我哋街坊客好多都識做㗎，見我哋忙都好快食完俾返張枱」，如果遇到「唔識做」客人會善意提醒，用一貫飲食業作風「踢吓」張枱，主動詢問客人仍有否其他需要。
寵物友善Cafe申牌照避免爭拗 負責人：可以更加proper去歡迎佢哋
另一中籤食肆是寵物友善的咖啡室「骨子裡 Bone Studio」，一年前由西營盤遷至旺角寵物友善商場U Corner地庫，地方變得更大，門外有一幅露天空地可容納寵物。「骨子裡」採用半開放式設計，水吧已佔用店內的一半空間，旁邊只有1張大枱及4張細枱，其門外的商場範圍，擺放了地台及坐墊，讓主人與寵物一同休憩。
首階段獲1,616宗合資格的食肆申請牌照，獲批名額有1,000個。首輪已中籤「骨子裡」，負責人Boni稱「都係好彩」，認為申請牌照的食肆較想像中少，抽中機率算大，但指店內空間及座位已「定死」，相信獲牌亦不會對生意有太大幫助。
骨子裡不時與商場U Corner合作，在空地舉辦寵物相關的活動。
Boni 本身有養小狗，與其他大部分狗主一樣，每逢周六日及假期皆會帶小狗外出，非常明白狗主曾遇過的難處，「呢啲基本上好似係（狗主）weekend一定會做嘅嘢，所以我自己有餐廳嘅時候，都會希望歡迎狗仔嚟。」提及不少客人為陪狗仔，願意外賣在店外露天的空地用膳，惟一旦天氣惡化，便會非常「尷尬」：「突然間落雨或者狂風，佢哋都會問可唔可以入一入嚟，但係其實你知道唔可以。」
Boni認為牌照另一用處是避免爭拗，憶述旺角店開業初期，同時間有怕狗及狗主的客人光顧，怕狗客人已坐在商場的座位，他善意提醒狗主盡量避免走到該客人旁邊，以免發生衝突，惟該狗主認為餐廳「針對」狗隻，於是向食環署投訴餐廳有狗隻進入，嘆「我覺得咁樣好難過，佢哋有網上抹黑我哋，有咗牌照我覺得反而係有少少保護咗。」
根據《食物業規例》，准許狗隻進入餐廳會被罰款及停業，甚至有機會吊銷牌照，包括餐廳的露天範圍。不少食肆以外賣形式，讓狗主及狗隻到戶外地方進食，Boni有感他們在食肆受「少少差別待遇」，認為「有牌照我哋可以更加proper去歡迎佢哋，可以招呼得狗仔客人好咗，唔需要佢哋一定要坐戶外，一定要用外賣餐具。」
Boni
人、寵客無可避免要取捨
「骨子裡」大概只有兩成是狗主客人，如何取捨寵物客及普通客？Boni坦言無可避免要取捨，但希望盡量做到「人寵共融，互相尊重」，指怕狗客人未必討厭動物，或許只是對狗毛敏感需要遠離，實施前將會做好準備功夫，包括提醒前線員工注意事項、加強店內衞生、向商場申請空地增設垃圾桶，以及因應情況調節座位空間等，僅盼任何客人「佢哋嚟到鍾意飲我嘅咖啡，鍾意我呢度嘅地方。」
「骨子裡」過去曾與商場合作，在空地舉辦領養日及小狗的16歲生日派對。獲牌後，Boni稱會方便辦更多寵物相關活動，笑言「都有諗過好唔好7月9號，邀請可能20隻狗狗一齊嚟咁樣」，始終新規例仍須多方協調，目前正在考慮中，認為如最終成功舉辦是一大樂事：「好似大家一齊慶祝，香港真係好犀利終於有啦，終於可以一齊入嚟啦」。
她亦擔心將來能否續牌，指食環署職員明言：「開頭第一個禮拜就日日都會落嚟」，但明白新措施大家非常緊張，「佢哋會可能執得嚴謹啲，我自己就覺得盡做啦，嘗試咗唔成功、我唔得都冇辦法啦。」
