【獨媒報導】《香港國安法》即將實施5周年，新任警務處處長周一鳴稱，本港社會仍然存在暗湧，指目前看似已很平靜，「大家好似都係向緊拼經濟」：「其實大家又唔可以忘記一樣嘢，暗湧係一定有，唔會話無。」周一鳴指仍有一小撮人希望「喺中間啲位，做一啲圖謀不軌嘅嘢」，重申必須居安思危。
周一鳴今早出席新城電台節目訪問，被問到《香港國安法》、《維護國家安全條例》已經先後在本港實施，周一鳴稱社會存在暗湧，認為必須居安思危，「諗吓點樣再做好啲」：「國家安全無話有一日今日唔使，已經搞掂。等於一般罪案一樣，有侵害他人條例，所以就唔需要擔心有人打架，唔會㗎嘛。你有法例，一樣會有人犯法，呢個係無一個完成嘅一日。」
新城財經台圖片
主持問「仲可以煽動到啲乜嘢」 周一鳴：法例喺度唔代表無人會犯法
主持追問，「仲可以煽動到啲乜嘢」，周一鳴則稱「唔係完全冇發生」，稱早前已提到，有店舖仍在單據上印上字眼：「呢啲都係要去特別小心，國安法已經5周年，舊年亦都有《維護國家安全條例》。法例係喺度，我都有好多其他法例，又代表無人會犯法？」周一鳴又強調，國家安全人人有責，應是香港每個人的使命，不單純是警察的責任，「你我他，個個都有份。」
主持又問到，警方常常強調「好了傷口忘了痛」，「有啲已經癒合㗎啦，點解耐唔耐又要捉佢出嚟撕開睇吓呢？大家有少少覺得，呢啲創傷係咪已經無咗、完咗，如常地開開心心，寬懷地生活？」
籲外界不應標籤國家安全 強調屬重中之中的法例
周一鳴稱「其實唔係唔寬懷㗎」，重申國家安全是要令家園更安全，而「好了傷口忘了痛」便等如居安思危：「係呀，而家安全㗎。問題係等如點解要有同事喺街上巡邏呢？舊年劫案得90宗，點解仲要巡邏呀？」他呼籲，外界不應將國家安全作標籤，強調國安是重中之中的法例。
被問到管治風格，周一鳴稱已加入警隊30年，常常要帶領大大小小的團隊，一直希望做到開明，及理解不同年代的同事，以充分利用對方的優點，並鞏固團隊文化。他又認為在高壓工作下，幽默感十分重要。
新城財經台圖片
今年將安裝1,385組閉路電視 指破案效果理想
警方去年在全港安裝615組閉路電視，周一鳴提到，今年將再安裝1,385組，去年已有122宗案件因安裝閉路電視後而破案，至上月底更增至226宗，認為效果理想。他稱警方長遠會善用科技，推動智慧警政及精簡流程，以提升警隊工作效能及提供更優質服務。
周一鳴強調，警隊就查看閉路電視有很好的規則，包括銷毁和查看，稱不時收到議員、街坊訴求，都希望可以在其家居附近安裝更多閉路電視，令其感到更安全。
此外，周一鳴表示科技日新月異，警隊設有專家小組定期開會了解趨勢，令警隊可以提早準備。他在節目中提到，警隊就「抄牌」沒有訂立關鍵績效指標（KPI），惟強調道路安全十分重要，執法是要避免發生交通意外。