早兩日，吸煙與健康委員會主席湯修齊，推動加100%煙稅兼禁止2009年後出世嘅人買煙，你叫一眾市民點可能估得到，係特區由治及興， 說好香港故事嘅大前提下， 居然仲可以有啲咁低能嘅建議，係一聽就知道前線無法實行，更甚至逼死一眾前線工作者，唯一可以諗到更加好嘅形容詞就係「低能上司思維」。以後做便利店查身份證仲密過警察，除左一聲「天才」，法官大人，我無野講。
不過最精彩嘅係，加100% 煙稅嘅天才策略，覺得令到盒裝香煙加價，就會少咗人食煙。大哥，麥當勞都識加價，又唔見少咗人食麥當勞？只要需求存在，只會有人比更加多嘅錢去滿足。 湯生不妨跟返社會賢達朋友落一轉蘭桂坊，睇吓幾十蚊煙稅有冇辦法成功降低吸煙率？
當然我明白呢啲家住私人樓嘅高等人種，自然唔知道香港公屋住户，鐵閘每個星期收到嘅私煙傳單有幾多， 大幅度調整煙草稅，最尾受苦嘅，就係奉公守法唔買水貨嘅既基層煙民。為咗降低表面數字上嘅吸煙率，變相一步一步將呢一班好市民推向犯法嘅邊緣。另一方面，將一包煙加到超過$150大元，難道平日食開嘅就會因為咁樣唔食？成個吸煙與健康委員會就係道德塔利班再世，企喺度德高地思考現實問題，最尾問題解決唔到，之後令有需要嘅人面對更加多嘅問題。盲目加稅，基層負擔大咗，吸煙人口無減少，製造一個雙輸局面，除左離地，就係一個字 — 廢。
當然，喺職場打滾多年，我已經想像到吸煙與健康委員會眾多委員，一定覺得自己好叻叻，諗咗條天才政策幫助香港長治久安，底下一班勞心勞力嘅員工高呼「湯生好嘢，多謝湯生」。近年世界各地有效減輕吸煙率而出現嘅科技產品，例如電子加熱煙，反而被進一步禁止，將食剩嘅嘢放喺梳化底，唯一會幫你清理嘅就係老鼠仔。
講到尾，一班社會賢達用Windows XP（已經好俾面）嘅思維去處理2022年嘅社會問題，試問呢個政策思維點可能令到香港社會繼續有進步？
（本網歡迎各界投稿，文章內容為作者個人意見，並不代表本網立場。）