【獨媒報導】原定於去年舉行的第40屆香港電影金像獎，因疫情兩度順延至昨在九龍灣國際展貿中心復辦，是三年以來首次實體頒獎禮。已故導演陳木勝執導的《怒火》榮獲最佳電影、最佳導演、最佳剪接及最佳動作設計4個奬項。85歲謝賢憑《殺出個黃昏》奪得最佳男主角，成最年長影帝；中國女演員劉雅瑟則憑《智齒》奪最佳女主角，二人均是首度入圍該獎項。
與歷屆金像獎有別，今年頒獎禮首度合併2020及2021年度的參選電影進行投票，亦是自2019年後，再度恢復實體舞台形式頒獎。
MIRROR任表演嘉賓 台上獻唱主題曲《金人》
第40屆香港電影金像獎昨晚7時半於九龍灣國際展貿中心舉行，主題為「金像四十 不惑如初」。頒獎禮由第37屆金像獎新晉導演得主彭秀慧擔任司儀，本地男子組合MIRROR成員以全黑西裝造型登場，跳唱由Gareth. T（湯令山）作曲﹑梁栢堅及Benny Han填詞的主題曲《金人》。
許冠文獲頒終身成就獎：香港人就算要喊，都會笑住嚟喊
頒獎禮先由黃子華頒發終身成就獎，由從影50年，曾參演《鬼馬雙星》、《半斤八兩》等經典電影的許冠文奪得。許領獎時笑言，在第一屆金像獎憑《摩登保鑣》獲最佳男主角後，以為獎盃陸續有來，但一直都沒有，直至上個月爾冬陞致電給他，說要準備頒終身成就獎予他時，「我話『吓，咁快同我埋單？』，我仲要攞獎，仲有冇得攞㗎？」他後正色道：「我真係唔覺得自己終身有咩成就，我只係覺得自己一世好命，可以喺香港呢個我認為全世界最美麗、最浪漫、最有機會嘅地方，喺呢度成長，呢個係我嘅好命。」
許冠文又感謝「最可愛、最親愛」的許氏三兄弟，許冠武、許冠英、許冠傑，形容三人多年來「默默咁支持住我，一句聲都唔敢出」。他提到許冠英曾指他「聲大夾惡，又倔強又固執」，而現時「已經去咗天堂」，一度哽咽道：「我知道佢今晚一定係睇緊，我想藉呢個機會同佢講，所有你對我嘅批評都係啱嘅，我冇咗你其實真係唔得，我好掛住你同多謝你，呢個獎係大部分都屬於你㗎。」
他又多謝太太，稱她是自己所有喜劇靈感的來源，因她有非常樂觀的人生態度，「今日天跌咗落嚟，聽日都會更好」。他說，「有陣時我覺得自己山窮水盡嘅時候，想拍悲劇，佢就鬧我，駛乜你拍悲劇俾我哋睇，呢個現實仲唔夠悲，睇新聞就得啦，段段都係啦，而家我哋口罩都戴咗兩年幾。你一定要繼續拍喜劇，令到我哋香港人就算要喊，都係笑着哭！」許說，他也是以此宗旨拍所有喜劇。
許最後提示「所有香港電影兄弟姊妹」，說「未來嘅日子，我哋會面對比較困難啲嘅時光，但我哋千祈唔好怕，我哋明天一定會更好，因為香港人永遠會有嗰種精神，就算要喊，我哋都會笑住嚟喊。」
陳木勝獲最佳導演 陳妻：相信呢個獎圓滿咗佢一生
由已故導演陳木勝執導的《怒火》奪得最佳電影、最佳導演、最佳剪接及最佳動作設計4個獎項。
陳木勝去年因鼻咽癌離世，他憑遺作《怒火》獲選為最佳導演，藝人劉德華代未能親身出席的陳木勝妻子朗讀感謝辭，期間眼泛淚光。陳妻感謝金像獎頒最佳導演予其丈夫，「相信呢一個獎圓滿咗佢嘅一生，佢一定會報以微笑同埋感到十分欣慰」。陳妻感謝在《怒火》中每一位工作人員，又特別鳴謝岑建勳、潘耀銘，以及家人、朋友、電影從業員前輩，「我代表我先生同你哋講聲多謝，一切盡在不言中。」全場續連番鼓掌作鼓勵。
85歲謝賢憑《殺出個黃昏》 首度提名最佳男主角即獲獎
最佳男主角則由從影近70年、現年85歲的謝賢憑《殺出個黃昏》奪得，這是他首次入圍該獎，成最年長影帝。謝賢戴招牌墨鏡、黑色口罩，由同樣入圍最佳男主角的林家棟攙扶上台，全場站起報以熱烈掌聲及歡呼聲，謝賢說「多謝大家！」
林家棟在旁說，謝賢是「香港金像獎電影史上，唯一一個攞男主角全世界企起身嘅人，你係第一個」，謝賢聞言大笑，雙手合十道謝。謝賢多次欲拉下口罩說話，林家棟隨即替他拉起，稱「因為人多，醫生叮囑呢就最好唔好」，續問謝賢有否其他感言，謝僅捧着獎座道：「我唔識講，我淨係識攞呢個嘢（獎座）㗎咋。」再獲全場掌聲。
劉雅瑟憑《智齒》首奪最佳女主角：電影給我一束光走到這裡
鄭保瑞執導的《智齒》是今年金像獎最多提名之作，終奪最佳女主角、最佳編劇、最佳攝影及最佳美術指導4個獎項。現年33歲的中國女演員劉雅瑟，首度入圍便擊敗吳君如、鞏俐、周秀娜成為影后，主持宣布其名字時，她先向鏡頭展示「V字手勢」，隨後雙手合十向身後觀眾鞠躬。
劉先以廣東話表示自己心跳很快、十分緊張，又感謝所有參與《智齒》的人員，鄭保瑞導演和「家棟哥」。她後以普通話感謝金像獎及香港電影給她一個機會，又指自己在港從影多年，「我覺得電影給了我一束光，指引我走到這個地方，希望未來有更多機會陪伴電影走得更遠。」
《梅豔芳》女主角王丹妮奪最佳新演員：希望作品可以對得住梅姐
今年共有3部改編自真人真事的電影入圍，包括《梅豔芳》、《媽媽的神奇小子》及《濁水漂流》。其中獲12項提名的《梅豔芳》，飾演「梅姐」的王丹妮獲最佳新演員。她分享感言時激動流淚，感謝所有參與《梅艷芳》的幕前幕後，因為所有人的努力才造就她今天成就。王又感謝父母成為她最強後盾，亦望能在自己喜歡的行業內，繼續拍更好的作品給大家。
王又指，在排戲中深深感受到「梅姐」堅持和永不言敗的處事態度，令她能克服重重難關，「希望能夠有一個好嘅作品可以對得住梅姐。」
馮皓揚廖子妤首奪最佳男女配角 廖：好榮幸我嘅夢想喺香港成真
最佳男女配角分別由《媽媽的神奇小子》馮皓揚和《梅艷芳》廖子妤奪得。出生於馬來西亞、後來港發展的廖子妤上台時連番哽咽，她先用國語向父母致謝，感謝他們無條件支持自己的夢想，再轉用廣東話感謝《梅艷芳》團隊、戲中對手王丹妮和老闆古天樂等。她指自己今年來港滿10年，「我由一個人都唔識，到而家我望住台下，有好多朋友、曾合作過的對手、導演、好多人，多謝你哋畀機會我喺度做戲。我好榮幸我嘅夢想喺香港成真，多謝你哋摻埋我玩。」
至於年僅17歲、飾演少年版蘇樺偉的馮皓揚，表示非常高興能獲獎，「呢個奬真係好重，我頭先台下望咗咁多，呢個獎嘅重量，我呢一刻仲未完全感受到」。他感謝導演、監製、出品電影公司等，指雖然跑步的戲份較多，但整個「好認真、好正」的拍攝氛圍令他從未感到辛苦。他又感謝家人，並承諾用最大努力用心做好每一個角色，「希望有一日我可以好自信同大家講：『我叫馮皓揚，係一個出色嘅香港演員。』」
憑《手捲煙》獲新晉導演的陳健朗，上台讀出戲中對白「唔講一，唔講三，講義。唔講風，唔講雨，講咩？講雷」，他感謝所有台前幕後「捱義氣成就這部作品」，又感謝林家棟零片酬接拍，「冇咗你我相對覺得套電影會好失色」。最後又謂：「電影嘅大海真係好廣闊，我好希望我之後嘅一生都係繼續專注創作，繼續做更加多香港電影畀大家。」
《時間的初衷》獲最佳原創電影歌曲 ToNick：避唔到，我哋一齊捱
最佳原創電影歌曲則由《一秒拳王》主題曲《時間的初衷》奪得，由周國賢和恆仔@ToNick作曲，鄭敏作詞，周國賢和ToNick主唱。身兼電影導演的ToNick主音趙善恆領獎時說，「我哋會繼續喺香港呢個地方創作」，並提及2018年憑《長相廝守》提名同一獎項，當時曾於其他頒獎禮表示「多謝大家令到我哋相信香港仲係一個有希望的地方」。直到今年領獎，「我想講我知道好難，但希望大家可以繼續相信香港係一個有希望的地方」，並引電影對白說「避唔到，我哋一齊捱」。
周國賢則表示，以為自己和電影沒有緣份，感激恆仔在2018年邀請他參演，「呢部電影前前後後，拍完之後，呢幾年間無論我自己或者整個世界都發生咗好多嘢，呢部電影同呢首歌畀咗好大力量我。」
填詞的鄭敏則表示，填詞時想寫一念天堂一念地獄，「我哋當下做嘅每一個決定就好似一副骨牌，可能影響下一個決定，甚至影響其他人的生命」，又指「人又好，事物又好，地方都好，可以消失，但事件係永遠存在，都係源自於我哋每個決定。我希望大家會記得相信自己嘅決定，堅持自己嘅決定」。
他又說，近年很多人說「多元宇宙」，他相信宇宙是這樣運行，「即使係低潮時，你覺得自己啱嘅決定，到頭來人哋覺得係錯，呢副骨牌未去到最後都已經散晒、爛晒、錯晒，但我希望去到最尾，你哋會相信喺另一個時空裡面，你副骨牌會去到最尾，會去到你心目中嘅烏托邦。」
曾被質疑非香港電影 《少年的你》曾國祥：我得到嘅嘢都係香港電影畀我
頒獎禮首個環節，先為原定2020年舉行、但因疫情取消實體頒獎禮的上屆得獎者補頒獎項。《少年的你》獲最佳電影、最佳導演及最佳編劇等8獎，奪最佳導演的曾國祥領獎時表示，「我知道部戲出咗以來，一路會有人質疑部戲算唔算香港電影，但我好想講嘅係，無論以前同以後，邊度可以畀到機會我拍戲、我學到嘅嘢、我得到嘅嘢、我拍攝嘅精神都係香港電影畀我。所以多謝香港電影，多謝所有為香港電影付出嘅前輩同電影工作者，多謝金像獎40年嚟畀平台扶持優秀嘅電影人，香港電影加油！」
《少年的你》監製許月珍則形容，《少》是奇妙的經歷，「事隔兩年有些少驀然回首，已經燈火闌珊處，希望香港電影人加油，香港電影金像獎加油」。而憑《少年的你》歌曲《Fly》獲最佳原創電影歌曲的岑寧兒，則向作曲作詞的盧凱彤致謝：「多謝盧凱彤，呢首歌嘅所有成績都係屬於你，恭喜你。」
黃綺琳：願香港觀眾可以喺戲院睇到自己想睇嘅電影
憑《麥路人》獲最佳男配角的張達明說，「多謝金像獎，我等咗佢好多年」，而憑《叔叔》奪最佳男主角、71歲的太保，則表示「我嘅電影經歷係喺香港起步嘅，香港電影教識咗我好多嘢，可以喺香港攞到最佳男主角獎，對我嚟講好有意義」
憑《金都》獲新晉導演、已移居台灣的黃綺琳則表示，會「繼續努力拍自己想拍嘅電影，講自己想講嘅故事，祝願香港觀眾可以喺戲院睇到自己想睇嘅電影」。而因於回歸當天發布《中華頌〉惹來爭議的林二汶，首度公開露面，她憑《金都》獲最佳原創電影音樂，表示：「我會繼續做音樂，以禮樂為藝，以德和做人。」
張家輝台上尋ERROR保錡 曾國祥稱「ViuTV咩都講得」
今屆典禮不少嘉賓擦出火花，頒發新晉導演的曾國祥和馮德倫，對話時提及曾國祥肥了，馮問會否因為其父親（曾志偉）基因「犀利得濟」，曾笑說「我諗係，我其實扯得高已經好托賴」，馮續說：「唔係喎，今晚係ViuTV轉播，唔應該講你阿爸，唔講得」，曾回答：「唔緊要，ViuTV係咩都講得㗎」，全場掌聲、笑聲、歡呼聲雷動。
而頒發最佳男主角的張家輝，發言前先指受ViuTV工作人員所託向ERROR成員吳保錡打招呼，續問「保錡喺邊度？」，並跟他打招呼，鏡頭拍到保錡面露錯愕舉手示意。保錡曾在紅地毯受訪期間，表示偶像是張家輝，望能找到他握手，有記者訪問張時複述其願望。典禮結束後保錡發文表示：「好感動可以出席金像獎頒獎典禮，現實看真的很感動和震撼。我真的很愛張家輝，希望有一天可以成為一個喜劇演員。」
古天樂：點都會留喺呢個圈度，做好香港電影
最佳電影由古天樂和施南生頒發，古天樂致辭時先表示今晚很開心，「停擺咗兩年，今晚終於可以做到一個實體頒獎禮。睇到四哥攞獎，真係好感動。」他又數度提及其投資的科幻電影《明日戰記》將於下月上映，惹來全場大笑，古又握拳道：「我敢講，我所有今日得到嘅一切，都係呢個電影圈度攞返嚟，我今日得到嘅一切係觀眾同電影畀我。我點都會留喺呢個圈度，我一定會做好香港電影，我一定會搞掂《明日戰記》！」在旁的施則笑着附和指，疫情下業界受衝擊，感激任香港電影工作者總會會長的古天樂付出，投資較另類的電影。
而最佳編劇由張婉婷和莊澄頒發，張身穿全黑套裝出席，其男友導演羅啟銳月初突然離世，終年69歲，二人曾合作多部經典電影，包括《秋天的童話》、《玻璃之城》、《歲月神偷》等。
第40屆香港電影金像獎得獎名單
＊最佳電影：《怒火》
＊最佳導演 ：陳木勝《怒火》
＊最佳編劇：歐健兒、岑君茜《智齒》
＊最佳男主角：謝賢《殺出個黃昏》
＊最佳女主角：劉雅瑟《智齒》
＊最佳男配角：馮皓揚《媽媽的神奇小子》
＊最佳女配角：廖子妤《梅艷芳》
＊最佳新演員：王丹妮《梅艷芳》
＊最佳攝影：鄭兆強《智齒》
＊最佳剪接：彭正熙《怒火》
＊最佳美術指導：麥國強、王慧茵《智齒》
＊最佳服裝造型設計：吳里璐、葉嘉茵《梅艷芳》
＊最佳動作設計：甄子丹、谷軒昭、谷垣健治、李忠志《怒火》
＊最佳音響效果：杜篤之、吳書瑤《梅艷芳》
＊最佳視覺效果：余國亮、林嘉樂、梁偉民、洪敏詩《梅艷芳》
＊最佳原創電影音樂：坂本龍一《第一爐香》
＊最佳原創電影歌曲：時間的初衷《一秒拳王》
作曲、主唱：周國賢、恆仔@ToNick
填詞：鄭敏
＊新晉導演：陳健朗《手捲煙》
＊最佳亞洲華語電影：《美國女孩》
＊專業精神獎：周國忠
＊終身成就獎：許冠文