文／採訪：隊長
各位大埔街坊，有無印象大埔有模型鋪呢？除咗一間連鎖玩具模型鋪進駐大埔外，其實近十年都無一間有信譽而又可以比街坊聚腳吹水模型鋪：「出左新模型喎，我地幾時出旺角買？」、「哎吔，上次唔記得買支新油，家下噴到一半要出去買油」，有玩開模型嘅人，相信都遇過以上情況。
想當年細細個嗰陣，模型鋪前總會擺放四驅車賽道比小朋友鬥車；喺櫥窗睇模型，買完之後再請教老闆點樣砌；買模型時，同隔嚟個小朋友傾下傾下做埋朋友添。呢啲畫面有冇街坊記得呢？當年網絡冇宜家咁發達，人與人之間嘅關係簡單，興趣一致就好容易傾多啲，大家可能係模型鋪長駐嘅熟客，又或者係只有一面之緣點過頭嘅學生哥。
模型噴油「工作室」
原來今年大埔區內有一間模型工作室靜靜雞開張，默默提供「街坊式」嘅模型服務比大家，佢哋就係Liberty Studio 噴油工作室。一行入店內，已經見到有幾個客人噴緊自己嘅作品，但聞唔到刺鼻嘅油味，只係聽到啲啲「池池」嘅聲。再行前少少，望到一個高過成年男士嘅展示櫃，相當吸引，即時令人回想起兒時嘅模型鋪櫥窗，一定係預留比老闆「表演」嘅舞台呢，但竟然仲擺放咗客人喺工作室完成嘅作品。
呢個噴油工作室嘅主人係Rudy同拍擋Belle，兩位都係大埔人，佢地深深體會大埔模型友嘅苦況。Rudy表示自己懷念細個喺模型鋪打躉、屋邨後樓梯噴油嘅開心時光，但後來因工作同家庭關係暫停咗自己砌模型嘅興趣。
Rudy 同Belle 希望喺宜家艱難嘅時期能夠提供一個空間比街坊、大小朋友，可以互相傾下計噴下模型，製造歡樂，所以成立咗呢間工作室。Rudy平日喺鋪頭幫手，佢會主動比意見客人： 「用咩工具、點溝顏色、用咩技巧去噴，我都會同佢地分享。」客人唔識嘅問題都會問Rudy嘅意見。聽落就好似屋邨模型鋪叔叔嘅感覺，連佢都笑住話：「呢度係租地方送技術。」
舒適地方 幾遠都想嚟、幾夜都想留
Belle指出客人主要有兩類：學生、上班族。佢表示同過去10年比較，宜家無咁多學生玩模型，主要因為呢個年代多左好多現成玩具，「即食文化」會令人覺得砌模型相當困難；亦有可能因為大埔無一間全面嘅模型鋪，令學生想玩都無從入手。
客人當中更有一位學生嚟自港島區，Rudy解釋，「佢每個星期都會一早入嚟大埔坐足成日，有時會預先砌好再帶上嚟噴，有時會喺工作室砌。相對區外同類嘅工作空間，大埔嘅位置確實係寬敞得多。」佢再表示，大埔有中學會舉辦模型班作為課外活動，如果同學有興趣嘅話都可以帶埋家長上嚟了解吓。
另一類上班族客人，好多時都買咗一堆鍾意嘅模型，但就無地方、空間同設備去砌，佢哋更擔心喺屋企有小朋友、怕油漆氣味散唔到，所以無法喺屋企「開工」。Rudy笑住話，「有客人喺一開張嗰時，就捧住咗好多盒模型上嚟，佢哋平日一有時間就會上嚟把握機會『繼續開工』，為佢哋嘅作品扮靚。」老闆深深理解香港人工作時間長，再加上住喺大埔，可能都要長途跋涉先可以「回鄉」，食得飯嚟都就到深夜時段⋯⋯所以工作室都會為客人開放，直到完成指定部份工序，相信呢個安排唔係每一間工作室可以做到。
電子奶嘴 VS 創意藝術
近年，「電子奶嘴」非常流行，因為比電子產品小朋友玩，可以有「即時效用」，慳番家長唔少壓力同時間，但如果無「電子奶嘴」又得唔得呢？Rudy分享「曾經有客人帶埋小朋友嚟，小朋友四圍行，一時睇人噴油，一時睇吓模型展示櫃，全程都無向大人扭偈要『電子奶嘴』」。佢指出其實只要對準小朋友嘅喜好，砌模型都係一個好好嘅親子活動。此外，工作室仲有好多位置可以使用，兩位老闆都希望可以開一啲模型親子班，令更多父母好好陪伴小朋友，發展同一個興趣，同時提升小朋友嘅創意藝術。
老闆：想用「人情味」為大埔人打氣
香港人因工作、時間或土地問題，難免會放下兒時嘅興趣，而呢一、兩年發生太多社會問題、疫情又蔓延無期；兩位老闆成日諗，「如果有個地方可以比街坊遠離日常工作、生活嘅壓力，又可以結識番志同道合嘅街坊，集合返大家嘅『人情味』，應該可以為大埔人喺呢個艱難時刻帶嚟一個有少少『歡樂』嘅地方。」
Liberty Studio
Liberty Studio 噴塗工作室
地址：大埔汀角路51A號太平工業中心4期1302室。