aka生命嘅另一種讀法
兒女恨仇？年少氣盛？精神崩潰？飛來橫禍？天災人患？車多路窄？江湖恩怨？樓宇失修？孤苦無依？
每段故事，每個意外，呈現緊油麻地嘅面貌，定係更進一步，側寫出整個城市嘅本相？
（注︰全部真人真事……除非……你話報紙都係假新聞）
1. 地點︰彌敦道逸東酒店外 死者︰男，三十一歲，跑車乘客 事故︰車禍
2. 地點︰賓館（近中華書局） 死者︰女，八十六歲，住客 事故︰跳樓
3. 地點︰新填地街超級市場 死者︰男，五十歲，顧客 事故︰持刀與人爭執，被警槍擊斃
4. 地點︰家（近廟街） 死者︰男，七十九歲，住戶 事故︰染疫
5. 地點︰渡船角 死者︰女，五個月 事故︰兇殺
6. 地點︰渡船角 死者︰男，二十七歲 事故︰跳樓
7. 地點︰登打士街垃圾站 死者︰男，八十八歲，路人 事故︰車禍
8. 地點︰廣東道尼泊爾餐廳 死者︰女，十三歲，尼泊爾人，食客 事故︰火災
9. 地點︰近油麻地街市 死者︰女，四十五歲 事故︰兇殺
10. 地點︰果欄 死者︰男，五十四歲，物流公司東主 事故︰車禍
你知死未？
暢銷書《相約星期二》：「要學習生存，就要先學習死亡。」睇吓呢道啲人點死，可以係了解一個地方嘅好方法。「油麻地的兩萬種死法」導賞團，抱持住同一理念，帶我哋走入縱橫交錯嘅街道，聆聽無名者嘅故事，從血脈同肌肉之中感受我哋嘅城市。
「地鐵站出口前嗰間便利店，發生過持刀劫案，兇徒將刀插入收銀員心口，hit and run，轉眼就唔見咗。街坊覺得一定係少數族裔做，喊打喊殺，話要趕佢哋出油麻地。一睇閉路電視，兇手果然係黃種人，仲要係黃種中國人⋯⋯
城市嘅縮影係社區，社區嘅縮影係一條街道，係一個街角，亦係一間便利店。每一個死亡故事背後，都牽連住數之不盡嘅生存憂患。
喂，識唔識個「死」字點寫呀你？