【獨媒報導】「今時今日，坐監都唔係咩大事啦，我又唔係第一個，亦唔會係最後一個。我哋呢啲年紀大，都唔需要諗將來、前唔前途，只係見到啲細蚊仔先煎熬。」
前年十一遊行案，民主黨葵青區議會主席單仲偕承認控罪，被判入獄14個月，緩刑2年。這名民主老兵從政三十六年來首次罪成。頭上白髮斑斑的單仲偕，在判刑前接受獨媒訪問時，表明坦然面對。他嘲道，自我安慰能力很強，「共產黨都益咗你廿年囉，只係宜家先見到晒個真正面目啫。共產黨係好有耐性，搞西藏搞新疆係講緊一代人嘅時間，大家要有心理準備。香港人頂住，好好保護自己。」
痛惜47人 設苦難專員支援黨友
「你話要找數咪找數囉，我呢啲起碼見到個隧道出口係幾耐，但你睇吓嗰四十幾個⋯⋯。」說的是初選47人案，同屬民主黨的胡志偉、尹兆堅、林卓廷和趙家賢正被還柙。單仲偕曾到獄中探望他們，在等候期間，遇上新民主同盟的任啟邦。單仲偕自言，還心痛鍾錦麟多一點，「佢啲細路畢竟仲好細⋯⋯。」
作為民主黨司庫，單仲偕自詡設立了「苦難專員」一職，全力支援在囚黨友和家人。「講得唔好聽，幫人一下唔覺意幫埋自己呢。」他透露，民主黨早前出售了一個工貿大廈單位，籌得近900萬元為黨員打官司。
單仲偕是典型香港仔，葵涌邨徒置區長大，考入港大主修植物學，副修計算機學系，1982年畢業後去了匯豐銀行做資訊科技，薪高糧準做了29年。
大學交流團認識李永達 區議會成從政起點
從政全因在1979年認識了李永達，那年聖誕節，唸大一的單仲偕報名參加交流團，前赴北京清華大學、北京大學，「重新認識中國」，行政長官林鄭月娥和李永達是交流團的副團長。
同年發生了一件大事，港督麥理浩到北京商討香港的前途問題。那次交流團後，單仲偕和李永達成了難兄難弟，後者在畢業後搞公共政策研究中心，又喚單仲偕加入。
在1982年3月，香港舉行首屆區議會選舉，單仲偕亦在那年畢業，加入匯豐銀行工作。他豪氣地說，「我咁多年打過一份工之嘛」。三年後，李永達喚他，「唔好淨係研究啦，你都參選吧」，又找來梁耀忠、黃耀聰和李志輝等組成「葵青七子」參選，這是單仲偕從政的起點。
從政生涯一帆風順，1994年首次出任葵青區議會主席，1995成為立法局議員，三年後即主權移交後的首次立法會選舉，李永達和何俊仁、黃偉賢均有意參選新界西；單仲偕遂提出轉戰資訊科技界，同樣一擊即中。
兩度出任葵青區會主席 批「宜家做區議會，都痴線」
1994年至1999年及2020年起兩度出任葵青區議會主席，前後相隔二十年，這是前無古人，相信亦後無來者。單仲偕其實在讀書時已研究區議會，可算是地區行政的祖師爺。葵青區成為民主派的得票重鎮，單仲偕同樣功不可沒。
「我當時做主席，係可以連繫到成個區，活動、運動又好，溝通都可以好咗好多，係真係做到嘢，真係爭取到嘢。嗰時有地政問題，處長親自嚟見我。嗰幾年搞地區嘢，我無往而不利，我可以講係好成功。」
今年60歲的單仲偕，五年前金盤洗手，交棒予許智峯，講明不再從政。老兵不死，前年區議會選舉，單仲偕再作馮婦，在葵青「華麗」擊敗自1991年起勝出該區、前民主黨黨友黃耀聰。他嘲諷對方是百搭人，笑言「搵食啫呢啲人，想等我香咗咪搏多次囉。By the way，我諗我哋唔係朋友啦。」
區議員辦事處位於麗瑤邨樂瑤樓，旁邊互委會的壁報板上，還貼著黃耀聰的海報。步出辦事處，抬頭一望，便是居住多年的華景山莊。在辦事處內，沒有區議會主席應有的派頭，連那些互委會敬贈的錦旗、牌匾，通通都沒有。單仲偕想了想說，「都係借返嚟，唔洗咁鋪張吧。」
「宜家做區議會，都痴線，餐餐都同我講61A（編按：違反《區議會條例》第61A條就職能的規定）。（官員）鍾意答就答，唔答就唔答。唉，我同你講呀，無咗對官員嘅制衡，問題遲啲就會浮現。」
轟「愛國者治港」摧毀《聯合聲明》
8.18流水式集會判刑當日，單仲偕一直伴隨李柱銘出入法院。在中午休庭時，陳健民載了他們到單仲偕位於華景山莊的家中吃午飯，陳健民喚他要做好入獄前的準備。單仲偕估計，自己的刑期最長為一年，他將坐牢當作悠長假期，早已配好在獄中配戴的膠眼鏡。
8.18流水式集會判刑當日，單仲偕一直伴隨李柱銘出入法院。
訪問當日，民主黨前主席胡志偉獲法庭批准外出奔父喪，前一日則是去年六四集會，24人被控非法集結，同為區議員的岑敖暉、袁嘉蔚和梁凱晴認罪判刑入獄4至6個月，他們均被褫奪區議員資格。
單仲偕笑言，議席對他來說不是顧慮，「你搞清楚，唔做唔係我損失。你經驗豐富，服務嘅質素都唔同。我2016年退咗休㗎啦，前年話要全取區議會，我咪選囉。」
人大常委通過「完善」選舉制度，愛國者治港成為「理所當然」。單仲偕帶點不屑地說，「咪無咗《中英聯合聲明》、無咗『港人治港，高度自治』囉，『愛國者治港』就係唔係『一國兩制』。」「有生之年都唔會有民主，共產黨根本唔信民主，佢無民主，點解要俾你？」
「我從政初衷就係因為『港人治港』嘛，嗰個年代，一係好似林鄭考AO，一係做民意代表。」單仲偕又補上一句，「同做官比，咁梗係做議員啦。」
民主派三十年一事無成？促認清中共真面目
立法會從此可能再沒民主派，新政制下的「直選」議席只剩下20席，參選更須尋求五大界別的選委支持，政制一下子倒車至八十年代。傳統民主派不時遭批評，三十年來一事無成，單仲偕聽到問題後，先是面色一沉，再反問，「你知唔知你對手係邊個？佢有幾多實力，你有幾多實力？」
他強調，民主派毋須否認或承認一事無成，「如果你覺得我哋一事無成，你做俾我哋睇，做到咪叻囉，我跟你㖭。」單仲偕建議港人熟讀《紅太陽是怎樣升起的：延安整風運動的來龍去脈》，「你唔打爆佢，佢唔打爆你，可能呢個走樣變形嘅一國兩制，可以維持多十五至二十年嘅。即係冇普選，返番去17、18年嗰種市民唔多參與嘅政治氣候囉。」
33年前曾「移民」澳洲 預計十分一港人移民
單仲偕是老派的人，他會邊說邊在信封上寫字，又會圈住寫過的字，拍照時又一定要著上西裝褸，「你等等我，我要著返件披。」政權秋後算賬，再也容不下老派的人，民主派元老便被一網打盡。在上庭前一星期，李永達便做東道主請食飯，民主黨的六十後都有出席，包括同案被告楊森、何俊仁。
「陳佐洱話香港係一本好難讀嘅書，宜家處理港澳事務後生嗰代覺得，難讀咪唔好讀囉，自己寫過囉，宜家就係咁㗎啦。」這是無奈的憤怒，更是老兵的咆哮。
港澳辦副主任張曉明早前表示，香港將會實現在大亂之後，必有大治。然而，移民成為港人前路的選擇題。對於移民，單仲偕有一個鮮為人知的故事。他1988年用了400元搞了個澳洲簽證，但7日後便急急回港，「養得起自己，養唔起阿爸阿媽，咪唔走囉。」
他慨嘆移民其實是「貧賤不能移」，但預計將有十份一港人、約70萬人，在未來5年內移民英國、加拿大和澳洲等地。
從政遺憾未能繼續「搵位傾」 料最壞尚未到來
2019年的農曆新年前後，有三批內地官員和單仲偕見面。單仲偕當時反映，必須叫停《逃犯條例》，不然將會爆大鑊，「我話你2019年區選會輸得仲慘過2003年，輸到唔夠一半。」對方明確回應表示，「做唔到」。
果然，反送中一發不可收拾，導致200萬人上街，自六月後幾乎每周皆有舉行遊行集會。單仲偕表示「所有合法遊行都有去」，他七月初和太太去馬爾代夫潛水，在水中展示了 Free Hong Kong 的旗幟。10.1遊行當日，單仲偕便對同案被告何俊仁說「我哋要找數㗎」，「嗯，證明我啲預視能力都幾強。」
前年10.1遊行當日
「如果阿爺肯繼續傾，柔啲柔啲咁搵位傾，可能避過佔中，避過埋反送中。」單仲偕說，這是他從政的遺憾之一，重申一直都相信「有得傾一定好過無得傾」。他垂下頭，再轉了兩下手上的原子筆說。
遭還柙當日，多名葵青區議員在區域法院外為單仲偕送車。在訪問中，單仲偕對香港的前路有點悲觀，他預期香港最差的情況尚未來臨。「鎮壓式管治令到港人唞唔到氣，我唔知道係咪絕望，但最差嘅時候一定未到，因為中共仲要搞台灣。搞完區議員宣誓仲要搞公務員、新聞界、教育。我肯定，最差時間仲未到，要做好心理同生理準備，大家加油守住吧。」
記者：麥馬高