（獨媒報導）上月底出獄的社民連前主席吳文遠，周五（5月13日）出席劉慧卿主持的網台節目。他提到一向較瘦的自己在獄中再瘦了20磅，出獄前亦被囚友叮囑「出去小心啲」。不過他在出獄翌日已參與社民連五一勞動節示威。吳文遠表示，自己不是從「有冇用」的角度出發，希望在恐懼中留有希望，「都係嗰句，起碼我哋覺得，唔做唔得，硬係過唔到自己個關」。
獄中瘦廿磅 靠寫作消磨時間
吳文遠因參與2019年10.1及10.20的未經批准集結，去年被判囚14個月零14日，上月30日從喜靈洲監獄出獄。他在劉慧卿主持的網台節目《議會內外》中提到，自己一向較瘦，在獄中更瘦了20磅。劉慧卿問及伙食是否很差，吳笑言「係餓唔死你嘅，但啲嘢難食到一個點，你只會食到唔餓就停」，如無鹽、無油、無味道的肉，和又酸又乾的橙。
對於獄中衛生情況，吳文遠幽默道，比起曾在荔枝角收柙所見過的肥大如貓的老鼠，喜靈洲已相對「企理」。吳又指，自己在獄中有保持寫作習慣，但無打算出版，笑言「我傳咩啊大佬……我40幾歲」。不過他曾建議同案的民主黨楊森在獄中寫自傳打發時間，近日得知對方已經完稿。
被囚友叮囑「出去小心啲」 稱「每一次都係摸索同冒險」
在出獄翌日，吳文遠隨即參與社民連五一勞動節的示威，劉慧卿笑說「你又威喎」，問道社民連如何在風高浪急的社會中自處。吳笑言囚友在他臨出獄時也叮囑他「你出去小心啲啊，如果唔係又入返嚟」。他表示，「每一次（行動）都係摸索同冒險」，須按個人能力逐次評估，不能衝動。他指自己見證了示威的代價在十年間變得沉重，「由罰款$2000、到守行為，到坐三四星期、幾個月，到而家，郁啲路過都一兩年」。
他強調沒有預期行動有何效果，「呢一刻唔係從有無用嘅角度去做，如果你話有冇用，所有嘢都無用」，只盼讓彼此在恐懼之下留有希望。「都係嗰句，起碼我哋覺得，唔做唔得，硬係過唔到自己個關」，劉慧卿笑道「你哋社民連就係咁」。
嘆失新聞自由 堅稱不會移民
吳文遠入獄前，《蘋果日報》、《立場新聞》及《眾新聞》仍在運作，但他出獄後全數已不復存在，吳直呼無奈。對於候任行政長官李家超指新聞自由已在香港人的袋中，劉慧卿形容自己「扲極都扲唔到、係咪我個袋穿咗窿」，吳文遠則直言現時已沒有「免於恐懼的自由」，只須簡單問問本地記者寫稿時有否自我審查，便知道還有否新聞自由。
在節目尾段，劉慧卿當頭問道「咁你走唔走（移民）先，講啊」，吳文遠果斷搖頭，連答三次「唔走、唔走、唔走」。
