【獨媒報導】年初四在香港大球場上演賀歲盃，香港明星隊3：7 不敵世界明星隊。對於政府大力推動盛事經濟，被問到是否支持舉辦更多體育盛事，李健和表示支持，他認為：「主辦機構都好難齊集到咁多嘅世界級球星，每年搞兩至三次其實都幾好，起碼香港球迷可以近距離睇到現場球星嘅表現。」
今場比賽共炮製了十個入球，現年56歲、三屆香港足球先生李健和，他在賽後就高呼「好正」，形容今次機會難得：「一世人都未必有一次，同全世界最高class 嘅球星一齊踢波。」他又大讚對手沒有欺場，而且表現賣力，更作出瞓身飛剷：「可以令到佢哋表演啲技術到俾大家睇吓。」
體育盛事對香港形象有幫助？ 李健和：無乜諗到
至於舉辦體育盛事，是否對香港形象有幫助，李健和則表示「無乜諗到」：「以往香港都有舉辦呢啲比賽，今次就粒粒巨星，睇落去全部都踢過世界盃，大部分都攞過世界盃，所以其實係好事。」
記者問李健和最喜歡哪一名球星，「和哥」就稱「個個都鍾意」：「我哋睇電視、睇世界盃裡面見到嘅球星都喺晒現場，所以係好難得嘅一次機會。」
李健和最欣賞李華度 賽後高呼「好正」
不過，李健和及後指最欣賞李華度：「我自己本身都好鍾意李華度，睇到佢今日射一球笠射，好正！可以喺現場睇到一班咁嘅球星去表演腳法，真係夢寐以求！」另外，「和哥」透露在賽前曾作跑步訓練，「起碼都可以叫做跑得郁先」。
香港明星隊今場由范俊業把關，他在賽後表示，能夠與世界球星同場作賽感到高興。對於力敵大衛韋拿，「豬仔」就指自球員年代都抱著「盡做」的心態，至到今天亦然：「以前個年代都希望『盡做』，因為宜家體力無咁好，但都係『盡做』，最緊要大家開心。」
范俊業賽後與占士交換球衣 指與球星比賽感覺夢幻
現年47歲的范俊業，在職業生涯期間曾是港隊首席門將，在退役後踢而優則教，現為香港足球代表隊、港超聯球隊冠忠南區守門員教練。在今場表演賽期間，范俊業力敵一眾世界明星隊球員，比賽其間左飛右撲，更救出了大衛韋拿的笠射。
「豬仔」在賽後與大衛占士交換球衣，他對能與世界球星交手感到高興。他提到，在退役後都有踢衛生波，過去兩星期更特地參與訓練。
今屆賀歲盃是自2019年以來再次舉辦，共有20,340人入場。范俊業亦認為，最緊要球迷睇得開心：「觀眾俾得錢入嚟，同埋比到人哋睇，繼續值得搞呢啲比賽。」他表示，一眾世界明星隊球員雖然年紀較大，但功架猶在：「好似以前打機，就係搵呢啲人，宜家真係可以同佢哋踢，都真係幾夢幻。」
記者：麥馬高、劉苑嫻
攝影：周頌謙