農曆年間外遊，停左兩星期冇寫文。其實外遊最擔心就係錯過左啲戲（雖則好多時係爛片）。但農曆年唔怕，因為堆賀歲片多數都有排上，哪怕點爛都好，只要爭到個檔期，就可以印兩個星期銀紙。寫呢篇文時己經係十五元宵，幾套港產賀歲片居然都仲上緊。既然係咁，就寫下呢幾套港產片。對，之前幾篇文又寫金融又寫鬼佬片，但其實原本在呢度寫文，係想寫港產片的。
香港既農曆年越黎越冇氣氛，唯獨係睇賀歲片仲有些少氣氛。而農曆年（同聖誕，仲有打風）係少數上乜戲都大收旺場的檔期。賀歲片呢味野，可能係港產片獨有的genre。對，大陸而家都有賀歲片，但呢種風俗好大程度（若非全部）都係由香港傳過去。至於鬼佬片更加係冇呢家野。當然鬼佬一樣有星閃閃但古仔空洞，志在輕輕鬆鬆兩粒鐘的片。例如佐佐治古尼（George Clooney）的「盜海豪情」Ocean’s 唔知幾多系列（其實都只係11拍到13）就係「鬼佬賀歲片」典。而佐治古尼唔係拍得幾套呢啲野，邊有錢拍「各位觀眾晚安」（Good Night, and Good luck）之類？杜琪峰都係靠鄭秀文高圓圓的愛情片養住間公司，先可以拍「自己鍾意的東西」。
問題係，Ocean’s Fourteen之類雖則有賀歲片格局，但冇「節日氣氛」。嚴格黎比，鬼佬賀歲片就只有賣哂節日氣氛聖誕節上果堆。例如「真的戀愛了」（Love Actually）或「緣份精華遊」（The Holiday）之類。或者「緣滿情人節」（ Valentine's Day），及更唔掂的「緣滿除夕夜」（New Year's Eve）都算。但，點講都同我地每年幾套賀歲片不能相比。
由於農曆年係黃金檔期，以前上親的多數係大片。而有趣地，其實最初的港產「賀歲片」並冇咁明顯的新年氣氛。最早的當然係「最佳拍檔」系列，就只係大堆頭。往後過年好多時仲有「雙周一成」（周潤發周星馳成龍）的Blockbuster。不過講最有過年氣氛，當然係去到後來的「八星報喜」，「八喜臨門」，「富貴逼人」甚至係「家有喜事」之類。喜劇，大團圓，講家庭，當然仲有例牌地各位演員出黎同你「恭喜發財」。然後唔知點樣呢種風氣慢慢淡左，直到2007年更加大吉利是，新年流流，上套講白粉的「門徒」，夠哂百無禁忌。
所謂物極必反，直到近年「賀歲片」呢味野又走番出黎。多得曾志偉同黃百鳴，其實應該話多得TVB。原諒我低品味，但近年睇曾志偉的 「我愛HK20XX」 對黃百鳴的 「xx喜事」已係指定動作，好似細個睇謝賢狄波拉咁。而差不多每一年我都覺得係曾志偉，即係TVB，比較好睇。原因一固然係佢堆戲「大陸味」冇咁重。我非本土膠，但農曆年去睇黃百鳴果堆杭洲酒店，我還是拒絕的（雖則最後都係睇哂）。而且，曾志偉堆片，再公式化，始終都仲係有個古仔，有起承轉合，黃百鳴果堆就實在太求其炒埋一碟。呢個同幕後班底當然亦有關係。
直到舊年，見到黃百鳴同曾志偉合作一齊拍「最強喜事」，實在搞到我亂哂。完全係蜘蛛俠又加埋入復仇者聯盟咁，齊齊力撼「金雞SSS」。而結果兩套戲都相當唔掂。Always settle for less，不如都係比番「我HK香港2014」我啦。
今年又咩環境？TVB依舊，但變左「衝上雲霄」電影版。OK，其實「賭城風雲2」都係TVB，但我會理解係「王晶果套」。而兩套都當然唔再係「我愛HK20XX」果回事了。另外仲有吳君如再斬多幾両的「12金鴨」。曾志偉同黃百鳴？就一齊搞左套票房仆直的「浮華宴」
唔使講，我梗係全部睇哂啦。係，我知票房冠軍係「多啦A夢」，我都有睇。之前個星期係「皇家特工」（Kingsman: The Secret Service），我都有睇。但又如何？你唔係當呢堆係「賀歲片」下話。況且，再之前星期係「木昇戰記」（Jupiter Ascending）添，套片爛到不堪，又再證明票房同質素未必好大關係。
排名不分先後，先講「衝上雲霄」。睇戲既野（其實好多野都係）最緊要係自己個期望。賀歲片一般你未入場都知想點，好少會出現有啲文盲以為「飛鳥俠」（Birdman）係另一套super hero片，然後入場叫回水之類的笑話。
「衝上雲霄」的電視劇，我一集都冇睇過。頂多睇過下陳慧姍（第一輯呀可？），同埋唔知乜水去歐洲溝女仲要在餐廳影埋相比第條女發現，或者係呀吳鎮宇好似要做手術，胡杏兒死過又番生之類。簡單黎講，就係完全冇睇過
咁對於我呢類背景知識係零的觀眾黎講，入場有乜期望先？就都係睇靚人靚景啦。唔通你覺得會有乜劇情？不外乎都係你溝我我溝你溝黎溝去之類。而就此而言，套戲都算合格啦。有人話似睇左幾段MV，我覺得係個幾公平的評價。喂，係咁上下啦，你媽TVB之餘又諗下乜人入場丫。而最好既地方就係，其實呢啲咁既情節，拍套戲兩粒鐘唔夠講哂佢咪好，拖做幾十集的電視劇反而仲難搞。
真係要講，比較令人失望既係，啲景實在唔係幾靚，真係budget有限，定因為好多地方香港航空冇飛？既然投共，下年搵Air China贊助啦，至少多啲航點。如果你要講「劇情」或「演技」，其實吳鎮宇同鄭秀文果條線可能最好，鄭秀文演得相當好添。但兩位畢竟都一把年紀，特別係吳鎮宇，皺哂鬆哂啦，見佢擺個chok樣實在都好辛苦。
所以，都係睇另外果兩對啦。古天樂同蛇蛇，還可以啦。但蛇蛇都真係一把年紀。係，本人十幾廿年前好迷蛇蛇，套「跑馬地的月光」我睇左N次。事隔十幾廿年，佢真係仲keep得好好，但都真係十幾廿年前。男人睇戲既野，梗係自古美人如明將，長江後浪推前浪啦。有得睇，就睇朱璇啦。朱璇真係冇撚得頂，講寫實就應該三個男主角都爭佢，然後三個女主角都想毒死佢。可惜朱璇得果少少戲份。證明呢個世界都唔係講食力，係講論資排輩。郭采潔都好架，可以收埋台灣票房添（佢以為），但衰在好多時係個絕症化療樣（咁都鬧我劇透？今日十五元宵啦大佬，況且睇幾分鐘都估到啦）。人地新年入場唔係想睇呢啲嘛。係，當年百無禁忌入場睇「門徒」都係為左睇張靜初比人搞咋。唔係你以為睇乜？了解金三角定全球販毒？
嫌回帶未回夠皮既，放心，無線黎緊仲有套「十月初五的月光」。係呀，就係果套「十月初五的月光」，拍電影呀。又仲係張智霖同蛇蛇呀，我至愛的葉念琛大導導演添，問你死未。
Ok，另一套，「12金鴨」。即係吳君如陣營，大家理解為「金雞SSS」的延續。坦日講，「金雞」算好睇，但「金雞SSS」已經令我感到極其厭煩。鄒凱光果啲自以為好好笑的爛gag實在係煩過西。睇一陣都還可以，睇足成套，甚至幾套，你開始明白做乜人人都話港產片唔掂。而最重要既係，佢果啲自以為好醒既gag，十居其九，都係你上網己經聽過十幾廿次，識笑既，就真係只係得可歌可泣好慘冇網上（或冇朋友既）果啲阿叔。
咁唔使講，講劇情「12金鴨」當然比「鴨王」之類的垃圾為好。但「鴨王」畢竟有袁嘉敏有Jeana，你入場唔係睇劇情架下話？同樣地，你睇「12金鴨」，都係想笑下，你唔係想睇吳君如好似袁嘉敏咁露點下話。而就一套笑片黎講，「12金鴨」真係冇乜地方好笑。Idea都還算可以，宣傳昆你入場亦都做得幾好，但執行起上黎真係九流。即係，睇「金雞SSS」你都仲記得哥頓哥，睇完「12金鴨」你記得乜？係梁洛施？定係（佢以為好好笑）的泰文？而我最記得就係臨完場都要整件韓撚鹿晗出黎chok一大輪，唔知做乜春。吳君如好努力，仲碌左好多人情卡，好多人客串，但謹此而矣。仲要出（多左分幾鐘咁大把）的「加長版」？冇野下話。
去到「賭城風雲2」。套戲其實同第一集係有些少關係，但當然唔睇都冇乜問題。而即係，上集你都仲勉強明做咩叫「賭城風雲」。今集，大半套都在泰國，同埋架相當假的「飛機」上面，有何「賭城」？周潤發間屋？你話在烏克蘭都得架啦。更大件事既係，成套戲頭半截，你都唔係好明同「賭」有乜關係。完全係「掃毒」式的泰國著草片。賭局都冇個。睇得最多係發哥玩佢個潮洲機械人。見到Soler條洋腸在賭枱上出現，我幾驚會有「咀香園」廣告。
整體黎講，唔想新年流流入去睇人做鴨或妒忌人鴛鴦戲水既，「賭城風雲2」當然係最多大場面，打餐飽炸餐飽。但劇情一樣係咁無聊，甚至比另外兩套更加無聊。想重拾以往賭片的味道？王晶都費事再比你回味。成套戲唯一賣點係周潤發。但其實就靠周潤發加埋張家輝，己經夠佢惡搞或reference一大堆其他電影。睇呢套戲，純係集體回憶。至於劇情比上集更為鬆散，中段打泰拳之類更加係搵戲黎做拖時間，甚有神級爛片「笑詠春」 在詠春街拖足大半粒鐘的風範。
整體而言，三套戲都係個別分場拍得好，但成套夾埋就唔掂。「衝上雲霄」至少有女（即係朱璇），「賭城風雲2」有發哥（本人至愛的景甜都比人飛起埋），「12金鴨」就有……鄒凱光既笑料咯，你笑得出的話。
係呀，仲有黃百鳴同曾志偉套「浮華宴」，冇唔記得，亦唔止係因為篇幅所限。呢套直頭值得開一篇新文講。